ԵՐԵՎԱՆ, 19 մայիսի — Sputnik, Մարիա Շելուդյակովա. Ռուսաստանում Հայաստանի դեսպան Վարդան Տողանյանը, բացելով «Ռուսալեզու հեռարձակումն աշխարհում տեղեկատվության դերի բարձրացման պայմաններում» միջազգային համաժողովը «Ռոսիա սեգոդնյա» միջազգային տեղեկատվական գործակալությունում, կոչ արեց սերտ համագործակցել ռուսական ԶԼՄ-երի հետ և առաջարկեց հաջորդ համաժողովն անցկացնել Երևանում։
«Այս համաժողովը շատ կարևոր է։ Հայաստանը պատրաստ է բոլոր անհրաժեշտ պայմանները տրամադրել` հաջորդ համաժողովը Երևանում անցկացնելու համար», — նշեց Տողանյանը` հիշեցնելով, որ 2008-2009 թվականների Երևանն արդեն ընդունել է ռուսալեզու հեռարձակողներին ԱՊՀ-ից և Բալթյան երկրներից։
Դեսպանը նշեց, որ Հայաստանում ռուսաց լեզվի հանդեպ սերը միշտ մեծ է եղել, շատ հայեր աշխարհին նայում են ռուսական ԶԼՄ-երի պրիզմայով։ Տողանյանի խոսքով` ընդհանուր առմամբ, ռուսական լրագրողների ուսերին մեծ պատասխանատվություն է դրված, քանի որ նրանք մեծ լսարան ունեն` մոտ 200 միլիոն մարդ։
Ռուսալեզու ԶԼՄ-ները Հայաստանի տեղեկատվական դաշտում միշտ կարևոր տեղ են զբաղեցրել և զբաղեցնում են։ Երկրում գրանցված են բոլոր խոշոր ռուսական հեռուստաընկերություններն ու նաև բազմաթիվ ռադիոկայաններ, որոնց թվում է նաև «Ռոսիա սեգոդնյա» միջազգային տեղեկատվական գործակալությունը։
«Ռուսական ԶԼՄ-երը Հայաստանի համար պատուհան են դեպի մեծ տեղեկատվական աշխարհ։ Երկու երկրների դիրքորոշումները շատ հարցերում համընկնում են, և ռուսական մեդիայի ներկայությունը շատ կարևոր է», — ամփոփեց Տողանյանը։
«Ռուսալեզու հեռարձակումն աշխարհում տեղեկատվության դերի բարձրացման պայմաններում» համաժողովն անցկացվում է Մոսկվայում` ռուսալեզու ռադիոյի ոլորտի ներկայացուցիչների համագործակցության ամրապնդման նպատակով։
