ԵՐԵՎԱՆ, 24 մայիսի — Sputnik. Գունավոր հեղափոխությունների սպառնալիքը, որի զոհ կարող է դառնալ ցանկացած պետություն, հնարավոր է կանխել միասնաբար, Զավիդովոյում լրագրողներին է հայտնել Հայաստանի ազգային անվտանգության խորհրդի քարտուղարի տեղակալ Արամ Թանանյանը։
Չորեքշաբթի Տվերի շրջանում մեկնարկել է անվտանգության հարցերը համակարգող բարձրագույն ներկայացուցիչների միջազգային ութերորդ հանդիպումը։
Այս գիտաժողովը ռեկորդային է մասնակիցների թվի առումով. Միջոցառմանը մասնակցելու են ժամանել պատվիրակություններ 95 երկրից։ Հանդիպմանը քննարկվել է գունավոր հեղափոխությունների հակազդման թեման։
«Ժամանակակից աշխարհում գունավոր հեղափոխությունների զոհ կարող է լինել յուրաքանչյուր պետություն, եթե ժամանակին քայլեր չձեռնարկի նման (արտաքին) միջամտությունը կանխելու համար։ Դա կապված է հասարակության կայունության հետ, թե որքանով է հասարակությունը վստահում իր ղեկավարներին, պահպանում ավանդական արժեքները։ Մենք տեսնում ենք, թե ինչ և ինչպես տեղի ունեցավ Ուկրաինայում»,- ասաց Թանանյանը։
«Գունավոր հեղափոխությունները» արդիական թեմա են։ Այդ «գրասենյակը» պետք է միասնաբար փակել, որպեսզի աշխարհի բոլոր պետությունները հասկանան դա և հետ մղեն»,- ասաց Թանանյանը։
Նա բարձր է գնահատել անվտանգության հարցերով միջազգային հանդիպումների ձևաչափը, որն ամեն տարի անցկացվում է Ռուսաստանում ՌԴ անվտանգության խորհրդի հովանու ներքո։ Թանանյանի խոսքով` ֆորումը լիովին արդարացրեց իրեն գլոբալ մարտահրավերներին և սպառնալիքները հակազդելու համատեղ արդյունավետ միջոցներ մշակելու տեսանկյունից։