ԵՐԵՎԱՆ, 26 սեպտեմբերի — Sputnik. Ռուսաստանի Դաշնության տարածքում Facebook սոցիալական ցանցն արգելափակելու ծրագիր չկա։ Ինչպես հայտնում է ՌԻԱ Նովոստին, այս մասին ասել է ՌԴ նախագահի խորհրդական Գերման Կլիմենկոն։
Ռոսկոմնադզորի տնօրեն Ալեքսանդր Ժարովն ավելի վաղ հայտարարել էր, որ հայտնի ցանցը կարգելափակվի, եթե չկատարի ՌԴ տարածքում բնակվող քաղաքացիների անձնական տվյալների պահպանման հատուկ պահանջը։
Facebook-ը շարունակում է պնդել, որ քննում է այս հարցը, թեև պաշտոնական նամակ չի հղել։ Ռոսկոմնադզորը 2017 թվականին որևէ ստուգում չի իրականացնելու, իսկ 2018 թվականի վերաբերյալ Ժարովը դեռ կմտածի։
Կլիմենկոն մեկնաբանել է ստեղծված իրավիճակը։
«Հասկանում եմ, որ 2017 թվականին ստուգումներ չանցկացնելու վերաբերյալ պնդումներից կարելի է եզրակացնել, որ 2018 թվականին սոցիալական ցանցը կփակվի։ Իրականում դրանք լրիվ տարբեր իրադարձություններ են, և Ռոսկոմնադզորի գործընկերները ցանցը փակելու մտադրություն չունեն։ Ես զանգել ու հարցրել եմ»,- նշել է ՌԴ նախագահի խորհրդականը։
