ԵՐԵՎԱՆ, 17 նոյեմբերի – Sputnik, Անի Լիպարիտյան. Կարատեի Ռուսաստանի (WKF) չեմպիոն Հարություն Անտոնյանը Sputnik Արմենիայի հետ հարցազրույցում խոսել է իր կարիերայի և հայկական արմատների մասին։
Նրա խոսքով` Ռուսաստանում կարատեով զբաղվում են տարբեր ազգերի ներկայացուցիչներ, ու մարզիկները միմյանց հանդեպ դրական ու ընկերական են տրամադրված։
«Ռուսաստանում տարբեր ազգերի ներկայացուցիչներ կան կարատեի ոլորտում։ Լավ շփվում ենք միմյանց հետ, բայց ես, անկասկած, ուրախ եմ, որ հայ եմ», – նշեց նա։
Հարությունը նշեց, որ մասնակցել է ազգային հավաքականի ընտրական փուլին, հիմա պատրաստվում է տարբեր միջազգային առաջնությունների հավաքներին։
Ռուսաստանցի հայ կարատեիստը պատմել է, թե բացի կարատեից ինչով է զբաղվում։
«Սիրում եմ ֆուտբոլ խաղալ, ակտիվ ժամանակ անցկացնել, երբեմն սնոուբորդով եմ սահում։ Սովորում եմ Սուրգուտի պետական մանկավարժական համալսարանում` ֆիզիկական դաստիարակության ֆակուլտետում, արդեն ավարտել եմ բակալավրիատը` ադապտիվ ֆիզիկական դաստիարակություն մասնագիտությամբ», – ասաց Հարությունը։
Անդրադառնալով Հայաստանում անցկացվող կարատեի առաջնություններին մասնակցելուն` կարատեիստը նշեց, որ պատմական հայրենիքում այդ սպորտաձևի հետ կապված խնդիրեր կան։
«Պատրաստ չեմ հայկական առաջնություններին մասնակցելու, ցավոք, այդտեղ մեր մարզաձևն այդքան զարգացած չէ… Ես արդեն փոքր երեխաների եմ մարզում, բայց հիմա մտածում եմ միայն իմ մարզումների ու մրցումների մասին։ Եթե հետագայում Հայաստանից առաջարկություններ լինեն, ապա կարելի է մտածել»,– ասաց նա։
Հարությունը նշեց, որ հայրենիքը չի կարելի մոռանալ, ու մենք առնվազն պետք է տիրապետենք լեզվին, հարգենք ավանդույթները։
24–ամյա կարատեիստն իր սիրելի մարզաձևով զբաղվում է 17 տարեկանից։ Աշխատասիրությունն ու նպատակասլացությունն օգնել են նրան հաղթել սանկտպետերբուրգցի հակառակորդին ու ոսկի նվաճել։
