ԵՐԵՎԱՆ, 14 դեկտեմբերի — Sputnik. Ռուսաստանի Դաշնության նախագահ Վլադիմիր Պուտինն ամենամյա ասուլիսի ժամանակ թեմայով անեկդոտ է պատմել, երբ նրան հարց են ուղղել բանակի ու նավատորմի ծախսերի մասին։
Ռուսաստանի նախագահին հարցրել են` սպառազինության ծախսերը չեն վնասի՞ երկրի սոցիալական ծրագրերին։ Նախագահը կատակել է` եթե սեփական բանակիդ չկերակրես, ուրեմն օտարինը կկերակրես։
«Մի անեկդոտ կա։ Իհարկե, հին է, բայց արդիական։ Որդին գալիս է հոր մոտ։ Հայրը, որ նախկին սպա է, հարցնում է` այստեղ դաշույն կար, ո՞ւր է։ Որդին ասում է` չբարկանաս, բայց ես այն փոխել եմ հարևան բակի տղայի ժամացույցի հետ։ — Ցույց տուր ժամացույցը, այո, լավն է։ Իսկ եթե վաղը չարագործները գան մեզ մոտ, սպանեն ինձ ու մորդ, իսկ քրոջդ էլ բռնաբարեն, դու դուրս ես գալու ու ասե՞ս` բարև ձեզ, Մոսկվայի ժամանակով 12-ն անց կես է»,- ասել է Պուտինը։
Այնուհետև ՌԴ նախագահը հստակեցրել է, որ Ռուսաստանն այսօր սպառազինության նպատակով մոտավորապես 46 միլիարդ դոլար է ծախսում։
«ԱՄՆ-ում այսօր արդեն սպառազինության ծախսերի մասին օրենք է ստորագրվել, որը 700 միլիարդ դոլար է կազմում։ Մերը 46-ից մի քիչ շատ է, իսկ այնտեղ` 700։ Զգո՞ւմ եք տարբերությունը»,- ասել է Պուտինը։
Նա ավելացրել է, որ Ռուսաստանը սեփական անվտանգությունը կապահովի` առանց սպառազինության մրցավազքի մեջ մտնելու։
