ԵՐԵՎԱՆ, 11 մարտի — Sputnik. Ռուսաստանի նախագահ Վլադիմիր Պուտինը գաղտնի տեղեկություն ունի իր ամերիկացի գործընկեր Դոնալդ Թրամփի մասին։ Նման հայտարարություն է արել NBC-ի լրագրող Մեգին Քելին, որը նախկինում հարցազրույց է վերցրել ՌԴ նախագահից։ Այս մասին տեղեկացնում է Ռիա Նովոստին։
«Ես չէի ասի, թե Թրամփը դուր է գալիս Պուտինին, ես դա չզգացի նրա հետ զրուցելիս, և կարծում եմ, որ նա Թրամփի դեմ ինչ-որ բան ունի»,- գործակալությունը մեջբերել է Քելիի խոսքերը։
Լրագրողը չի հստակեցրել, թե ինչի հիման վրա է նա նման հայտարարություն արել։ Քելին միայն ասել է, թե Մոսկվան ինչ-որ տեղեկություն ունի Թրամփի մասին, որը, սակայն, դժվար թե կապ ունենա սկանդալային հեղինակազրկող տեղեկություն պարունակող փաստաթղթերի հետ։
«Կարծում եմ, խոսքը 1990-ական թվականներին ռուսների հետ Թրամփի սարքած փողերի, Ռուսաստանում և ԱՄՆ-ում նրա արժեթղթերի մասին է»,- ասել է նա։
Նշենք, որ անկախ փաստաբան Ռոբերտ Մյուլերը հետաքննություն է վարում ԱՄՆ ընտրություններին Ռուսաստանի միջամտության և ԱՄՆ նախագահ Դոնալդ Թրամփի` Ռուսաստանի հետ ունեցած ենթադրյալ կապերի գործով։ Թեև դա հերքում են ինչպես Սպիտակ տանը, այնպես էլ Կրեմլում։
Պուտինն ինքը Քելիի հետ հարցազրույցում հայտնել է, թե Մոսկվային ամենևին հարկավոր չէր խառնվել ԱՄՆ ընտրություններին։
