ԵՐԵՎԱՆ, 27 մարտի – Sputnik. Հետխորհրդային տարածքում հանցագործ աշխարհի առաջնորդի ամենահավանական թեկնածուն «օրենքով գող» Օլեգ Շիշկանովն է, որն ավելի հայտնի է «Շիշկան» մականունով։ Այս մասին հայտնում է «Փրամ Քրայմ» պարբերականը։
Աղբյուրի տվյալների համաձայն` Շիշկանովի «թագադրման» գործընթացը կսկսվի այն ժամանակ, երբ ընթերցվի Զախարի Կալաշովի (Շաքրո Մոլոդոյ) դատավճիռը։ Մոսկվայի Նիկուլինյան դատարանն այսօր նրան մեղավոր է ճանաչել շորթման գործով։ Դատավճիռը կընթերցվի մի քանի օրվա ընթացքում։
«Բոլոր բոսերի բոսի» թափուր տեղը վերանայվել է 2016 թվականի ամռանը Շաքրո Մոլոդոյի` հետխորհրդային հանցագործ աշխարհի առաջնորդի աղմկահարույց կալանքից հետո։ Շաքրոն իր հերթին քրեական աշխարհի «պատրիարքի» ոչ պաշտոնական կոչումը ստացել է 2013 թվականին Ասլան Ուսոյանի (Դեդ Հասան) մահից հետո։
«Երկար համաձայնեցնելու ու «քվեարկություն» անցկացնելուց հետո կանգ են առել Օլեգ Շիշկանովի թեկնածության վրա։ Նրան լավ է վերաբերվել նաև ինքը` Կալաշովը, որը կալանքից առաջ բավականին մտերիմ էր Շիշկանի հետ։ Իսկ ամենակարևորն այն է, որ համապատասխան առաջարկություն ստանալուց հետո Շիշկանը չի հրաժարվելու», — գրում է պարբերականը։
Հատկանշական է, որ մինչ այս տեղեկության հայտնվելը «գողական գահի» ամենահավանական թեկնածուն ադրբեջանցի «օրենքով գող» Գուլին էր (Նադիր Սալիֆով)։ Սակայն ավելի վաղ տեղեկություն էր տարածվել, որ Գուլին հանցագործ աշխարհի «լիկվիդատոր», հայ «օրենքով գող» Զապ Լեննականցու (Անդրանիկ Սողոյան) թիրախն է դարձել։
Հավելենք, որ 90-ականներին Օլեգ Շիշկանովի (Շիշկան, Օլեգ Ռեմենսկի) անունը շոշափվել է Լյուբերեցկայա, իսկ ավելի ուշ Ռամենսկայա կազմակերպված հանցավոր խմբավորումների թեմայով (նա վերջին խմբավորման առաջնորդն էր)։ 2000-ականների սկզբին նա ամենաազդեցիկ «օրենքով գողերից» էր։
