ԵՐԵՎԱՆ, 4 հուլիսի — Sputnik. Որպես օրինակ ներկայացվում է մի կազմակերպություն, որը կարողացել է աշխատակիցներին աշխատատեղում պահել «հայաստանցի տարեց կնոջ» օգնությամբ։ «Վեդոմոստի» ռուսական պարբերականը «Ինչպես են ակվարիումները, կատուներն ու ննջասենյակները գրասենյակներում ավելացում բիզնեսի արդյունավետությունը» վերնագրով մի հոդված է հրապարակել։ Հոդվածում ներկայացվում է նաև հայկական մենեջմենթով ընկերության արդյունավետ փորձը։
«Աշխատակցին աշխատատեղում պահելու համար ընկերությունները գրասենյակում ռելաքսի գոտիներ են ներառում։ Regus–ի տվյալներով` աշխատակիցների 43%–ը կցանկանային աշխատել ազատ ժամանակացույցով ու «հեռվից հեռու»», – գրում է պարբերականի թղթակից Արտյոմ Պանտելևը։
Հրապարակման մեջ նշվում է, որ տարիներ առաջ հայկական մենեջմենթով մի հայտնի ընկերություն Երևանից Մոսկվա մի տարեց կնոջ է հրավիրել։
«Այն ժամանակ քչերը գիտեին «բարիստա» բառը, սակայն տարեց կինը հենց այդ աշխատանքն էր կատարում. նրան առանձին սենյակ էին հատկացրել, ավազի վրա սուրճ եփելու սարք, ջազվե ու կավե սպասք էին գնել։ Աշխատանքային օրվա ցանկացած ժամի յուրաքանչյուր աշխատակից կարող էր մի բաժակ հիանալի «ձեռագործ» սուրճ վայելել։ Բնականաբար, կինը հիշում էր` ով ինչպես է նախընտրում` ինչքան շաքարավազով ու ինչքան փրփուրով», –նշվում է հոդվածում։
Հեղինակը գրում է, որ պատմությունը մեծ տարածում ստացավ ու ժամանակի ընթացքում շատ ընկերություններ սկսեցին պրոֆեսիոնալ «բարիստաների» հրավիրել։
