ԵՐԵՎԱՆ, 17 հուլիսի — Sputnik. Ռուսաստանի ներքին գործերի նախարարությունն առաջարկել է հեշտացված կարգով կացության իրավունք տրամադրել օտարերկրացիներին, որոնք ԽՍՀՄ քաղաքացիություն կամ Ռուսաստանում մտերիմ բարեկամներ ունեն։ Այդ մասին հաղորդում է ՌԻԱ Նովոստին` հղում անելով ՌԴ ՆԳՆ ղեկավարի առաջին տեղակալ Ալեքսանդր Գորովոյին։
Առաջարկվում է կացության իրավունք տրամադրել` շրջանցելով ժամանակավոր բնակության փուլը։
«Աշխատանքներ են իրականացվում նախագահի հանձնարարականի վերաբերյալ, մենք առաջարկում ենք Ռուսաստանում մտերիմ բարեկամներ ունեցող կամ ՌԽՖՍՀ տարածքում ծնված և խորհրդային քաղաքացիություն ունեցած օտարերկրացի անձանց կացության իրավունք տրամադրել՝ շրջանցելով ժամանակավոր կացության թույլտվություն ստանալու փուլը»,- ասել է Գորովոյը:
Նրա խոսքով` նախարարությունը պատրաստ է մինչև օգոստոսի 31-ն այդ օրինագիծը մտցնել կառավարություն։
