ԵՐԵՎԱՆ, 17 դեկտեմբերի — Sputnik. Ռուսաստանն ԱՄՆ–ի համեմատ ավելի քիչ դիվանագետներ ունի Հայաստանում ու ԱՊՀ այլ երկրներում։ Ռուսաստանի արտգործնախարար Սերգեյ Լավրովն այս մասին ասել է ուղիղ եթերում` պատասխանելով «Կոմսոմոլսկայա պրավդա» թերթի թղթակիցների ու ընթերցողների հարցերին։
«Ռուսաստանն իսկապես ոչ միայն Հայաստանում, այլև ԱՊՀ ցանկացած այլ հետխորհրդային երկրներում ԱՄՆ–ից մի քանի անգամ ավելի քիչ դիվանագետներ ունի։ Ամերիկացիներն աշխատելու իրենց չափանիշներն ունեն։ Մենք մեր ֆինանսական չափանիշներն ու սահմանափակումներն ունենք», – ասել է նախարարը` պատասխանելով ռուսական «փափուկ ուժի» հետ ընկնելու մասին հարցին։
Նրա խոսքով` ամերիկացիներն ակտիվորեն աշխատում են հետխորհրդային երկրներում։ Դրանք USAID–ներն են, միջազգային ինստիտուտերը, որոնց ֆինանսավորում են Դեմոկրատական կամ Հանրապետական կուսակցությունները և, բնականաբար, Ջորջ Սորոսը, որը «բավականին ակտիվ է աշխատում»։
«Այո, նրանք այստեղ քանակական գերակշռություն ունեն։ Շատերը սադրիչ օրակարգ ունեն։ Մենք չենք կարող քանակական պատասխան տալ, հայելային, նոր խամաճիկային կազմակերպություններ ստեղծել», – ասել է արտգործնախարարը։
Նա խոստովանել է, որ պետք է աշխատել քաղաքական բոլոր ուժերի հետ, այդ թվում` Հայաստանում։ Ռուսաստանն աշխատում է նրանց հետ և ոչ միայն Անդրկովկասում, այլև հետխորհրդային տարածքի այլ հատվածներում։
«Մենք աշխատում ենք համակարգային բոլոր ընդդիմադիրների հետ։ Ընդհատակյա ընդդիմադիրների հետ չենք աշխատում։ Մենք աշխատում էինք նաև Փաշինյանի կուսակցության այն 9 պատգամավորների հետ, որոնք Սարգսյանի խորհրդարանում էին», – ասել է Լավրովը։
Նա անհրաժեշտ է համարում մշակել ու առաջ տանել այն նախագծերը, որոնք հետաքրքրում են մարդկանց։ Նախարարը վստահ է, որ Ռուսաստանն այդ առումով որոշակի արդյունք է արձանագրել։
