ԵՐԵՎԱՆ, 15 հունվարի — Sputnik. Պետության ղեկավարը սմարթֆոն ունենալ չի կարող, քանի որ դա նշանակում է, որ մարդը համաձայնում է լիարժեք թափանցիկության։ Այս մասին ՌԴ նախագահի մամուլի քարտուղար Դմիտրի Պեսկովը հայտարարել է «ԱիՖ» թերթին տված հարցազրույցում։
«Իսկ ինչպե՞ս էին առաջ ապրում առանց հեռախոսների։ Հիանալի է», – պատասխանել է Պեսկովը պարբերականի այն հարցին, թե ինչպես է Պուտինն ապրում առանց հեռախոսի։
Սոցցանցերի նկատմամբ իր անձնական վերաբերմունքի մասին Պեսկովը ևս խոսել է պարբերականի հետ զրույցում։
«Կյանքումս ոչ մի անգամ Facebook չեմ մտել, երբեք չեմ եղել «Одноклассник»–ներում, ես չգիտեմ, ներսից ինչ տեսք ունի «ВКонтакте»–ն։ Նման ցանկություն չունեմ, և չեմ ուզում ինձ ստիպել», – ասել է նախագահի մամուլի քարտուղարը։
Ինչ վերաբերում է Telegram–ին, ապա Պեսկովը նկատել է, որ այն հետաքրքիր երևույթ է, այնտեղ բազմաթիվ ճանաչողական ալիքներ կան, սակայն քաղաքական ալիքներն օգտագործվում են որպես մանիպուլյացիաների գործիք։
