ԵՐԵՎԱՆ, 15 փետրվարի –Sputnik. Զանգվածային ծեծկռտուք է տեղի ունեցել Մոսկվայի հարավ–արևելքում գտնվող սրճարաններից մեկում։
Ականատեսները պատմում են, որ միջադեպը տեղի է ունեցել Պեչատնիկիի սրճարաններից մեկում։ Ծեծկռտուքին մի քանի տասնյակ մարդ է մասնակցել, հայտնում է РЕН ТВ–ն։
Ոստիկանության աշխատակիցները 18 անձի են ձերբակալել, ստուգում են նրանց առնչությունը սրճարանի մոտ տեղի ունեցած բախմանը։ Քրեական գործ է հարուցվել «Խուլիգանություն» հոդվածով։ Հայտնում են մոտ 10 տուժածի մասին։ ՆԳՆ–ում այս տեղեկությունը չեն հաստատում։
ԶԼՄ–ների տվյալներով` դեպքի վայրում տրավմատիկ զենքի կիրառման հետքեր են հայտնաբերվել։
Նշվում է, որ հարձակվողների ավտոմեքենաների պետհամարանիշները ձյունով և կեղտով էին ծածկված։ Վեճի մասնակիցները զինված են դանակներով և ատրճանակներով։
«Այստեղ անընդհատ միջադեպեր են տեղի ունենում։ Շատերն են բողոքում։ Մենք կրակոցներ ենք լսել։ Մարդիկ էին վազում», –РЕН ТВ–ն մեջբերում է ականատեսի խոսքերը։
«Կրակում էին ամբողջ թաղամասով։ Բազմաթիվ կրակոցներ են եղել, կարծես ինքնաձիգից կրակեին... Դրանք ատրճանակի կրակոցներ էին։ Ճայթուկներ չէին», –НТВ–ին պատմել է մեկ այլ ականատես։
Տեղի բնակիչները հայտնում են, որ այն օրվանից, ինչ սրճարանը հայտնվել է, այստեղ մշտապես վեճեր են լինում։
Միջադեպի վայրում աշխատում են իրավապահ մարմինները։
