ԵՐԵՎԱՆ, 24 հունիսի — Sputnik. Հայտնի հեռուստալրագրող, «ТВ Центр» հեռուստաալիքով հեռարձակվող «Ձայնի իրավունք» («Право голоса») հաղորդման հաղորդավար, «ТЭФИ» մրցանակակիր Ռոման Բաբայանը այսօրվանից «Մոսկվան է խոսում» («Говорит Москва») ռուսական հեղինակավոր ռադիոկայանի գլխավոր խմբագիրն է։ Այս մասին լրագրողը գրել է իր տելեգրամ ալիքում։
«Բարեկամներ, ուզում եմ տեղեկացնել, որ այսուհետ ես «Մոսկվան է խոսում» ռադիոկայանի գլխավոր խմբագիրն եմ։ Ընդունել եմ այս առաջարկը և շնորհակալ եմ այն մարդկանց, ովքեր հավատում են ինձ։ Սերգեյ Դորենկոն այս ռադիոկայանը դարձրեց երկրի ամենավառ ռադիոկայանը. ռադիոկայանը Դորենկոյի ձայնով էր խոսում։ Սերգեյի հեռանալուց հետո այս պաշտոնը ստանձնելն առանձին մարտահրավեր է։ Դորենկոյի հետ ռադիոկայանում աշխատած մարդկանց հետ ամեն օր մենք անելու ենք ամեն ինչ, որպեսզի կայանն էլ ավելի վառ դառնա», – ասել է Բաբայանը։
Մի փոքր ավելի վաղ «Незыгарь» տելեգրամ ալիքը հաղորդել էր, որ «Մոսկվան է խոսում» ռադիոկայանի գլխավոր խմբագրի թափուր տեղի հիմնական թեկնածուն Ռոման Բաբայանն է։ RT հեռուստաալիքի և Sputnik գործակալության գլխավոր խմբագիր Մարգտարիտա Սիմոնյանը, այս տեղեկությունը մեկնաբանելիս, նշել էր. «Իսկ իմ տեղեկության համաձայն` Ռոմանը ոչ թե հիմնական, այլ միակ թեկնածուն է։ Սպասենք պաշտոնական հայտարարության և աջակցության ալիքներ ուղարկենք»։
Նշվում է, որ Ռոման Բաբայանն արդեն ռադիոյում աշխատելու փորձ ունի։ 2013 թվականից երեք տարի գլխավորել է «Финам FM» ռադիոկայանը, ընդ որում` ռադիոկայանը հենց նրա օրոք է վարկանիշի աճ գրանցել և սկսել «լուրջ ԶԼՄ» համարվել, մինչև սեփականատեր Միխայիլ Գուցերիևը այն ամբողջությամբ երաժշտական դարձրեց։
Ոստիկանությունը չի տալիս Դորենկոյի դին. փորձաքննությունների կարիք կա
Հատկանշական է, որ Բաբայանն այսօր աշխատելու է նույն սեփականատիրոջ հետ։
Ռոման Բաբայանը ռազմական լրագրող է, Սոբյանինի ТВЦ հեռուստաալիքի հաղորդավար։ Տելեգրամ ալիքն ավելացնում է, որ նա լավ կապեր ունի Մոսկվայի քաղաքապետարանում հետ։
Հիշեցնենք, որ «Մոսկվան է խոսումի» գլխավոր խմբագիր Սերգեյ Դորենկոն մահացել է 2019 թվականի մայիսի 9-ին 59 տարեկանում ՃՏՊ–ի հետևանքով (ընկել էր մոտոցիկլետից)։