ԵՐԵՎԱՆ, 26 հունիսի — Sputnik. Խաչատուրյան քույրերն իրենց հոր` Միխայիլ Խաչատուրյանի սպանության գործով առաջին հարցաքննությունների ժամանակ մանրամասն նկարագրել են, թե ինչպես են կատարել հանցագործությունը։ Այդ հարցաքննությունների սղագրությունը հրապարակել է Mash տելեգրամ ալիքը։
Աղջիկներն իրենց ցուցմունքներում նույնն են պնդում, ընդհուպ մինչև նույնն են նաև ձևակերպումները։
Խաչատուրյան քույրերի խոսքով` հայրը միշտ ասում էր, որ շնանալը մեղք է և շատ վատ, սակայն քանի որ նրանք իր դուստրերն են և արյունը, նա կարող է անել իրենց հետ ինչ ցանկանա։ «Իսկ մենք պետք է միշտ ենթարկվենք դրան», – ասվում է Քրիստինայի և Մարիայի ցուցմունքներում։
Աղջիկները խոստովանել են, որ յուրաքանչյուրին իր դերն էր հատկացված։
Քույրերի խոսքով` սպանությունից մեկ ամիս առաջ հայրը սկսել էր հոգեբույժի այցելել, որի հետ հանդիպելուց հետո «իբրև թե նրա վիճակը լավանում էր»։ Սակայն իրավիճակը չէր փոխվում, ինչն էլ արդյունքում սպանության հանգեցրեց։
РБК գործակալությանը տված հարցազրույցում Մարիա Խաչատուրյանի փաստաբան` Յարոսլավ Պակուլինն ասել է, որ ընդհանուր առմամբ ցուցմունքները վերցված են առաջին հարցաքննություններից, սակայն ամբողջությամբ չեն բերվել։ Միջնեկ քրոջ` Անգելինայի փաստաբանը նշել է, որ Միխայիլ Խաչատուրյանի հետ ապրելու դեպքերի մասով ցուցմունքները նման են նրան, ինչ ասում էին աղջիկներն ավելի վաղ, սակայն հանգամանքների բոլոր մանրամասները չկան։
Միխայիլ Խաչատուրյանի աղմկահարույց սպանությունը տեղի էր ունեցել Մոսկվայում 2018 թվականի հուլիսի 27-ին։ 57-ամյա տղամարդու դիակը, վզի և կրծքավանդակի բազմաթիվ կտրած–ծակած վերքերով, հայտնաբերվել էր Մոսկվայի Ալտուֆևսկի մայրուղում գտնվող տան շքամուտքում։ Երեք դուստրերը խոստովանել են, որ իրենք են սպանել հորը։ Քննության ընթացքում պարզվել է, որ Խաչատուրյանը տարիներ շարունակ բարոյական և ֆիզիկական բռնության է ենթարկել դուստրերին։
Նշենք, որ քննության վարկածի համաձայն կրտսեր դուստրը` 11–րդ դասարանի աշակերտուհին, հոր պարանոցին ու մարմնին դանակի առնվազն 35 հարված է հասցրել։ Մյուս երկու դուստրերը հոր գլխին են հարվածել։ Դրանից հետո քույրերից մեկը փոքրի ձեռքից խլել է դանակն ու հարվածել սրտին։ Սպանությունից հետո կրտսեր քույրն անձամբ է ոստիկանություն զանգահարել։
Հիշեցնենք` Մոսկվայի Օստանկինյան դատարանը 2018–ի օգոստոսի 2-ին կալանավորել էր երեք քույրերին։ Սեպտեմբերի 27-ին Մոսկվայի Բասմանյան դատարանը հավանություն է տվել Խաչատուրյան քույրերի կալանքը «որոշակի գործողությունների արգելքով» փոխարինելու միջնորդությանը։ Նրանք տեղավորվել են առանձին բնակարաններ։
