ԵՐԵՎԱՆ, 19 մարտի –Sputnik. Նովոսիբիրսկից երիտասարդ հայ պարողը գերեց ռուսական «Առաջին ալիքի» եթերով հեռարձակվող «Dance Революция» հեռուստաշոուի ժյուրիին և հաջողությամբ անցավ նախընտրական փուլը։
Նախագծի երեք վարպետներն էլ` պարուսույց և դերասանուհի Ալլա Սիգալովան, համաշխարհային բալետի աստղ Սերգեյ Պոլունինը և երգչուհի Վերա Բրեժնևան նրան ասեցին բաղձալի «այո»–ն։
Նշենք, որ հաղթողի կոչմանն արժանանալու պայքարը մասնակիցը կարող է շարունակել միայն այն դեպքում, եթե ունենում է ժյուրիի բոլոր երեք անդամների «այո»–ն։
Մրցույթի կանոնների համաձայն` հաղթող ճանաչվելու համար պետք է անցնել 3 փուլ` ընտրական, մենամարտեր և եզրափակիչ։
Բեմում Նովոսիբիրսկի պարարվեստի քոլեջի 25-ամյա շրջանավարտը հիասքանչ պար ցուցադրեց և հիացրեց ժյուրիի անդամներին։
«Ես նույնիսկ չէի պատկերացնում, որ այդպես կարելի է թռչել։ Երջանի՞կ եք», – Հարությունին հարցրեց շոուի հաղորդավար Ալլա Միխեևան, ընտրական փուլն անցնելուց հետո։
Սակայն Հարությունը գոհ չէր սեփական ելույթից։ «Ոչ։ Ես վատ պարեցի», – պատասխանեց նա։
Բանն այն է, որ Հարությունին չհաջողվեց կատարել պիրուետը, հուզմունքն իրենն արեց։
«Ինձ դուր եկավ ձեր բարձր թռիչքը, դուք տիրապետում եք տեխնիկայի։ Բայց, հավանաբար, պիրուետը հուզմունքի պատճառով չստացվեց», – նկատեց Սերգեյ Պոլունինը։
Պատանի հայը զարմացրել է Լարա Ֆաբիանին ֆրանսիական «Ձայնը» շոուում. տեսանյութ
Սակայն Վերա Բրեժնևան աջակցեց պարողին` ընդգծելով, որ ինքը հավանել է նրա թռիչքը և տեխնիկան ընդհանուր առմամբ։
Իր մասին պատմելիս` Հարությունը նշեց, որ պարում է 7 տարեկանից։ Ծնվել է Հայաստանում, բայց մեծացել Նովոսիբիրսկում։ Հիմա աշխատում է «Русский балет» թատրոնում։
Անսպասելի էր. Կոնստանտին Մելաձեն «Ձայնը-8»-ի մենամարտերի փուլում չընտրեց Իննա Սայադյանին
«Ուզում եմ ցույց տալ, որ բալետը միայն փոքրիկ կարապների պարը չէ։ Ուզում եմ նաև, որ եղբայրս հպարտանա ինձնով», – խոստովանեց նա։
Հարություն Առաքելյանը միջազգային մրցույթների դափնեկիր է։ Սկզբում զբաղվել է ժողովրդական պարերով, այնուհետև սկսել դասական պարեր պարել։ Հյուրախաղերով եղել է Ղրիմում, Հեռավոր Արևելքում, Գերմանիայում, Չինաստանում և Հունաստանում։
Հիշեցնենք, որ մարտի 15-ին «Dance Революция» հեռուստանախագծի նախընտրական փուլի եզրափակիչ օրն էր։ Ընդամենը 6 տեղ կար ազատ։
