ԵՐԵՎԱՆ, 24 ապրիլի — Sputnik. Մոսկվայում հարգանքի տուրք են մատուցել Հայոց ցեղասպանության զոհերի հիշատակին։ Ինչպես տեղեկացնում են Ռուսաստանի Դաշնությունում Հայաստանի Հանրապետության դեսպանության մամուլի ծառայությունից, այսօր` ապրիլի 24-ին, ՌԴ-ում ՀՀ դեսպան Վարդան Տողանյանը և ՀԱԵ Ռուսաստանի և Նոր Նախիջևանի Հայոց թեմի առաջնորդ Եզրաս արքեպիսկոպոս Ներսիսյանը ծաղիկներ են խոնարհել Մոսկվայի եկեղեցական համալիրի տարածքում տեղադրված Հայոց ցեղասպանության զոհերի հիշատակը հավերժացնող հուշակոթողին։
Արարողությանը մասնակցել են նաև դեսպանության դեսպանորդ Բորիս Սահակյանն ու դիվանագիտական ներկայացուցչությանը կից ռազմական կցորդ Արմեն Լալայանը։
Ապրիլի 24-ի առավոտյան Մոսկվայի Սուրբ Պայծառակերպություն եկեղեցում մատուցվել է սուրբ Պատարագ, որի ավարտին կատարվել է Հայոց Ցեղասպանության սուրբ նահատակների բարեխոսության կարգ։
Նշենք, որ կորոնավիրուսի տարածումը կանխելու համար այս տարի` Հայոց ցեղասպանության 105-րդ տարելիցին, Հայաստանում և Արցախում չեն անցկացվում մասսայական միջոցառումներ։ Ե՛վ Հայաստանում, և՛ Արցախում չեն անցկացվել ամենամյա ջահերով երթերը, Ծիծեռնակաբերդի հուշահամալիրի մուտքը փակ է քաղաքացիների համար։
Այսօր առավոտյան Հայոց ցեղասպանության անմար կրակի մոտ սրբադասցված զոհերի հիշատակին հարգանքի տուրք են մատուցել ՀՀ նախահագ Արմեն Սարգսյանը, ՀՀ վարչապետ Նիկոլ Փաշինյանը` տիկնոջ հետ, ՀՀ ԱԺ նախագահ Արարատ Միրզոյանը և Ամենայն Հայոց կաթողիկոս Գարեգին Բ–ն։ Ծիծեռնակաբերդում անմեղ զոհերի հիշատակին այսօր իր հարգանքի տուրքն է մատուցել նաև Արցախի Հանրապետության նորընտիր նախագահ Արայիկ Հարությունյանը։
