ԵՐԵՎԱՆ, 28 ապրիլի – Sputnik. Ռուս գիտնականները բացահայտել են կորոնավիրուսային վարակի դեպքում մարդու թոքերի վնասման պատճառը։ «Արգումենտի ի ֆակտիին» տված հարցազրույցում բժշկական գիտությունների դոկտոր, պրոֆեսոր Լեոնիդ Լազեբնիկը նշել է, որ COVID-19–ը վնասում է հեմոգլոբինի գենը, ինչի հետևանքով արգելափակվում է երկաթի ատոմը։ Օրգանիզմում դրա պատճառով սկսում է երկաթի ավելցուկ առաջանալ։ Սա, իր հերթին, խանգարում է թթվածնի փոխանակմանը։ Որպես հետևանք առաջանում է թթվածնային քաղց` հիպոքսիկ համախտանիշ:
Գիտնականի խոսքով` նման բարդացման զարգացումը կարելի է տեսնել օրգանիզմում ֆերիտինի մակարդակի օգնությամբ։ Դա սպիտակուց է, որը արտադրվում է լյարդում և օրգանիզմում երկաթ հավաքում։ Ֆերիտինի ավելցուկը կարող է հրահրել իմունային համակարգի լուրջ արձագանք, այսպես կոչված՝ ցիտոկինային փոթորիկ։
Մարդու օրգանիզմում իմունային բջիջների ավելցուկ է կուտակվում։ Դա հանգեցնում է մարդու առողջական վիճակի էական վատթարացման։
Գիտնականը նշել է, որ չինացի, ինչպես նաև Ամերիկայի և Իսրայելի բժիշկները բացահայտել են, որ COVID-19–ի ժամանակ թոքերում առաջացող փոփոխությունները թոքաբորբի նման չեն։ Սա որոշակի կերպով հաստատում է նաև այն փաստը, որ թոքային հյուսվածքների խոցումը կարելի է հայտնաբերել միայն համակարգչային տոմոգրաֆիայի միջոցով, այն դեպքում, երբ ռենտգենոլոգիական հետազոտությունները կարող են ցույց տալ միայն սովորական թոքաբորբ։
Հայաստանում կորոնավիրուսից 67-ամյա կին է մահացել
Առողջապահության համաշխարհային կազմակերպությունը (ԱՀԿ) մարտի 11-ին նոր COVID-19 կորոնավիրուսի բռնկումը հայտարարել է համավարակ: Կազմակերպությունը բոլոր պետություններին կոչ է արել միավորվել վարակի դեմ պայքարում։
