ԵՐԵՎԱՆ, 16 հուլիսի - Sputnik. Ակնկալվում է, որ այս տարվա աշնանը COVID-19-ի դեմ պատվաստանյութի սահմանափակ խմբաքանակները բուժհաստատություններ կմատակարարվեն։ Տեղեկությունը հայտնել է Սմորոդինցևի անվան գրիպի գիտահետազոտական ինստիտուտի տնօրենի ժամանակավոր պաշտոնակատար Դմիտրի Լիոզնովը։
«Մենք ակնկալում ենք, որ սեպտեմբերին նոր տեսակի կորոնավիրուսային վարակի դեմ պատվաստանյութի սահմանափակ խմբաքանակը բուժհաստատություններ կմատակարարվի, որ հետագայում որոշվի՝ ով պետք է առաջին հերթին պատվաստում ստանա», - ասել է նա մամուլի ասուլիսի ժամանակ։
Լիոզնովը նշել է, որ հիմա Ռուսաստանում կամավորների վրա երեք արտասահմանյան պատվաստանյութ է փորձարկվում։ Դա մշակման արդեն երրորդ փուլն է, ինչը վկայում է այն մասին, որ պատվաստանյութերն արդեն անվտանգ են։
«Այդ պատճառով հույս ունենք, որ մարդիկ արդեն պաշտպանված կմտնեն համաճարակային նոր շրջան», - ասել է Լիոզնովը։
Գրիպի գիտահետազոտական ինստիտուտի տնօրենի ժամանակավոր պաշտոնակատարը նշել է, որ ինստիտուտը կորոնավիրուսային վարակի դեպ իր պատվաստանյութն է մշակում։ Այն մինչկլինիկական հետազոտությունների փուլում է և փորձարկվում է կենդանիների, մասնավորապես՝ կրծողների վրա։ Լիոզնովի խոսքով՝ անվտանգության գնահատումը կարող է մի քանի ամիս տևել։
«Դեղերն արդեն կիրառում ենք, իսկ պատվաստանյութ գնելու համար քայլեր կսկսենք անել». Թորոսյան
«Եթե ամեն ինչ անվտանգ լինի, 2021 թվականի փետրվարին մեր պատվաստանյութի թեստավորման մեջ նախատեսում ենք ներառել առողջ կամավորներին ։ Մեկ տարի կհետևենք նրանց», - պարզաբանել է Լիոզնովը։
Այսօրվա դրությամբ՝ Ռուսաստանում ավելի քան 752 հազար վարակված կա, 11 937 մարդ մահացել է։
Կորոնավիրուսը նոր թափ է հավաքում. ԱՀԿ–ն հետաքրքրվել է Сovid-19–ի ռուսական պատվաստանյութով
