ԵՐԵՎԱՆ, 6 նոյեմբերի - Sputnik. Ռուսաստանի արտգործնախարարության աղբյուրը, մեկնաբանելով Ադրբեջանի նախագահ Իլհամ Ալիևի՝ ՌԴ արտգործնախարար Սերգեյ Լավրովի հասցեին հնչեցրած արտահայտությունները, նշել է, որ ռուս նախարարի ասածում ոչ մի երկրի հասցեին կշտամբանքներ չկան:
«Անկեղծ ասած, մեզ այնքան էլ հասկանալի չէ հարգարժան Իլհամ Ալիևի էմոցիոնալ արձագանքը Սերգեյ Լավրովի մեկնաբանությանը։ Գուցե Ադրբեջանի նախագահի օգնականները նրան ինչ-որ այլ նյութ են ցույց տվել կամ սեփական մեկնաբանությունը ներկայացրել»,- ՌԻԱ Նովոստիին ասել է Ռուսաստանի ԱԳՆ աղբյուրը։
Խոսքը Լավրովի՝ «Կոմերսանտ» պարբերականին տված հարցազրույցի մասին է, որի ընթացքում նա ասել է․ «Մենք իհարկե մտահոգված ենք Լեռնային Ղարաբաղի հակամարտության միջազգայնացմամբ և Մերձավոր Արևելքից զինյալների ներգրավմամբ: Մենք բազմիցս կոչ ենք արել արտաքին խաղացողներին օգտագործել իրենց կարողությունները վարձկանների տեղափոխումը ճնշելու համար, որոնց թիվը հակամարտության գոտում, ըստ առկա տվյալների, արդեն մոտենում է 2000-ի»։ ՌԴ արտգործնախարարը նշել է նաև, որ զինյալների թեման Վլադիմիր Պուտինը բարձրացրել է հոկտեմբերի 27-ին Թուրքիայի նախագահ Ռեջեփ Թայիփ Էրդողանի հետ հեռախոսազրույցի ընթացքում, ինչպես նաև Ադրբեջանի և Հայաստանի ղեկավարների հետ կանոնավոր շփումների ժամանակ։
Ռուսաստանի ԱԳՆ աղբյուրն ասել է՝ ինչպես տեսնում ենք, մեկնաբանության մեջ ո՛չ Ադրբեջանի, ո՛չ էլ որևէ այլ երկրի հասցեին կշտամբանքներ չկան:
«Մենք խորապես մտահոգված ենք, որ վարձկան-գրոհայինները հայտնվել են անդրկովկասյան տարածաշրջանում, որի անմիջական հարևանը Ռուսաստանն է։ Այդ կապակցությամբ մեր ադրբեջանցի ընկերներին խնդրում ենք ուշադիր լինել սկզբնաղբյուրներին ծանոթանալիս», - հավելել է զրուցակիցը։
Նա նշել է, որ Ռուսաստանն իր մտերիմ երկրների համար զգայուն հակամարտության կարգավորման գործընթացում միշտ չափազանց զգուշորեն է կատարել միջնորդի դերը:
«Նախագահ Իլհամ Ալիևն ինքը բազմաթիվ անգամ հայտարարել այդ մասին»,- ասել է նա:
ՌԴ ԱԳՆ աղբյուրը շեշտել է՝ վերահաստատում են իրենց հանձնառությունը՝ աջակցելու Լեռնային Ղարաբաղի հակամարտության խաղաղ, քաղաքական-դիվանագիտական կարգավորմանը։
Զրույցի վերջում նա ասել է, որ վարձկանների ներթափանցումը սպառնում է տարածաշրջանի բոլոր երկրների, այդ թվում՝ Ադրբեջանի և Ռուսաստանի կայունությանն ու անվտանգությանը:
Հիշեցնենք՝ Արցախի դեմ սանձազերծած պատերազմի առաջին իսկ օրերից հայտնի դարձավ, որ Թուրքիան Սիրիայի հյուսիսից վարձկաններ է ուղարկել Ադրբեջան՝ Արցախի ու Հայաստանի դեմ օգտագործելու նպատակով։ Այս տեղեկությունները հաստատել էր նաև ՌԴ Արտաքին հետախուզական ծառայության պետ Սերգեյ Նարիշկինը:
ՌԻԱ Նովոստին էլ տեղեկացրել է, որ հոկտեմբերի 16-ին ավելի քան 1000 գրոհային է տեղափոխվել ղարաբաղյան հակամարտության գոտի։
Ձերբակալվել է Արցախի դեմ կռվող ահաբեկչական խմբավորման անդամներից մեկը
Հայտնի է, որ սիրիացի ահաբեկիչներին 1,5-2 հազար դոլար են խոստանում ռազմական գործողություններին 1 ամիս մասնակցելու համար։ Այս տեղեկությունը հաստատել են ոչ միայն հայաստանյան և ղարաբաղյան իշխանությունները, միջազգային ԶԼՄ-ներն ու արտասահմանյան իրավապաշտպան կազմակերպությունները, այլև Սիրիայի, Ֆրանսիայի, Ռուսաստանի, ԱՄՆ–ի և այլ երկրների իշխանությունների ներկայացուցիչներ։
Թուրքիան Հարավային Կովկասը լցրել է ահաբեկիչներով. ՀՀ ԱԳ նախարարի հարցազրույցը
Նշենք, որ հայկական կողմին արդեն հաջողվել է գերեվարել 2 սիրիացի վարձկան–ահաբեկչի։ Նրանցից առաջինին` Մեհրեդ Մուհամմադ Ալշխերին, բռնել են հոկտեմբերի 30–ին, իսկ երկրորդին` Յուսեֆ Էլ Աբեդ Էլ Հաջիին, հայ զինծառայողները գերեվարել են նոյեմբերի 1–ին։ Նրանք արդեն ցուցմունք են տվել և պատմել իրենց հավաքագրելու պայմանների մասին։
