ԵՐԵՎԱՆ, 7 դեկտեմբերի – Sputnik. Հանրային կարծիքի ուսումնասիրման համառուսական կենտրոնը (ՀԿՈւՀԿ) սոցիալական հարցում է անցկացրել ռուսաստանցիների շրջանում՝ արցախյան պատերազմի վերաբերյալ նրանց կարծիքն իմանալու համար։ Կենտրոնի ղեկավար Վալերի Ֆյոդորովը հարցման արդյունքները ներկայացրեց ՏԱՍՍ գործակալության հարթակում կայացած տեսակամրջի ընթացքում։
Նրա խոսքով՝ ՌԴ բնակիչների գիտակցության մեջ Կովկասը կարևոր և եղբայրական տարածաշրջան է։ Քաղաքացիների զգալի մասն այնտեղ ազգականներ ու ընկերներ ունի։ Բայց Կովկասի ընկալման երկրորդ կողմն այն է, որ սա արդեն «մեր տարածաշրջանը չէ». այնտեղ ուրիշ երկրներ կան, թեև դրանք կապված են Ռուսաստանի հետ։
«Ղարաբաղյան իրադարձությունների հանդեպ ռուսաստանցիների վերաբերմունքը կարելի է բնութագրել որպես հետաքրքրություն-հեռավորության պահպանում։ Գուցե անհեթեթ է հնչում, բայց ես փորձել եմ միավորել այդ երկու փոխբացառող միտումները։ Կան, իհարկե, նաև դրական էմոցիաներ՝ այն առումով, որ Ռուսաստանին հաջողվեց չխառնվել այդ հակամարտությանը»,-նշել է նա։
Հարցումն անցկացվել է 500 քաղաքում, մասնակցել է 18 տարեկանից բարձր 1600 մարդ։ Տվյալները հավաքվել են ինչպես պատերազմի ընթացքում, այնպես էլ դրանից հետո։
Ֆյոդորովի խոսքով՝ հարցվածների 19 տոկոսն ասել է, որ պարբերաբար և ուշադրությամբ հետաքրքրվում է պատերազմի թեմայով։ Եվս 53 տոկոսը հետաքրքրվել է ժամանակ առ ժամանակ։ Հարցվածների 26 տոկոսն ասել է, որ բոլորովին չի հետաքրքրվում այդ թեմայով։ Եվ կարևոր փաստ․ տարիքով մեծերն ավելի մեծ հետաքրքրություն են դրսևորել տեղի ունեցածի նկատմամբ։
Հարցին, թե ով է սադրել հակամարտության սրացումը, հարցվածների 5 տոկոսը պատասխանել է` Հայաստանը, 12 տոկոսը` Ադրբեջանը։ Եվս 33 տոկոսը պատերազմի համար մեղադրել է երկու կողմերին։ Կան նաև ավելի հեռուն գնացող տարբերակներ։ Այսպես, հարցվածների 6 տոկոսը կարծում է, որ հակամարտությունը սկսել է ԱՄՆ-ն, 5 տոկոսը մեղավոր է համարում Թուրքիային։
Ռուսաստանցիներին նաև հարցրել են, թե ով է ավելի շատ շահել խաղաղության համաձայնագրից․ 41 տոկոսը հայտարարել է, որ երկու կողմերն էլ շահել են։ 20 տոկոսն ասել է, որ շահել է Ադրբեջանը, 5 տոկոսը` Հայաստանը։ Մարդկանց չնչին տոկոսը կարծում է, որ հիմնականում օգտվել են երրորդ երկրները։ Այդպիսի տեսանկյուն ունի հարցվածների 10 տոկոսը։
Պատասխանելով այն հարցին, թե ինչ է սպասվում ապագայում, ռուսաստանցիների 39 տոկոսն ասել է, որ ամենայն հավանականությամբ այլևս պատերազմ չի լինի։ Շատ շուտով նոր պատերազմ կսկսվի. այսպես է կարծում 12 տոկոսը, իսկ որ հակամարտությունը կվերսկսվի, բայց ավելի ուշ՝ 31 տոկոսը։ Խոսելով հրադադարի համաձայնության հարցում Ռուսաստանի դերի մասին` հարցվածների 64 տոկոսն ասել է, որ Ռուսաստանը հիմնական դեր է խաղացել կրակի դադարեցման հարցում, 5 տոկոսը կարծում է, որ այն ոչ մի դեր չի խաղացել, 16 տոկոսն էլ ասել է, որ Ռուսաստանը երկրորդական դեր ունի։
