ԵՐԵՎԱՆ, 30 հունվարի – Sputnik. Բիզնեսմեն Արկադի Ռոտենբերգը Mash Telegram-ալիքի հետ զրույցում ասել է, որ Գելենջիկում գտնվող «պալատն» իրեն է պատկանում։
«Հիմա դա արդեն գաղտնիք չի լինի, ես եմ շահառուն։ Բավականին բարդ օբյեկտ էր, շատ վարկատուներ կային, ինձ հաջողվեց շահառու դառնալ։ Դա գտածո է, հիասքանչ վայր», - ասել է Ռոտենբերգը։
Նա խոստովանել է, որ շինությունը հյուրանոց է դառնալու։
Mash Telegram-ալիքն ավելի վաղ անդրադարձել էր այդ թեմային։ Լրագրողներն այցելել էին տարածք, նկարահանել շինության ներսը։ Գելենջիկի «պալատը», որը հիշատակվում է Ալեքսեյ Նավալնու հրապարակման մեջ, դեռ ընթացքի մեջ է։
Շինարարներն ասել են, որ աշխատանքներն ավարտին կհասցնեն 5-6 տարի անց։
Հիշեցնենք, որ այս շինությունը վերագրել էին ՌԴ նախագահ Վլադիմիր Պուտինին։ Նա էլ իր հերթին հայտարարել էր, որ չի նայել Գելենջիկի «պալատի» մասին ֆիլմը, քանի որ ժամանակ չունի, բայց դիտել է այն տեսագրությունները, որոնք ցույց են տվել օգնականները։ ՌԴ նախագահը վստահեցրել էր, որ «հետաքննության» մեջ նշվող ունեցվածքից ոչինչ իրեն կամ իր բարեկամներին չի պատկանում և չի պատկանել։
Նախագահի մամուլի քարտուղար Դմիտրի Պեսկովն էլ ասել է, որ Գելենջիկի պալատի սեփականատերերը մեկ կամ մի քանի գործարարներ են, իսկ Կրեմլն անուններ չի հրապարակի, որովհետև դա կոռեկտ չի լինի։
