Հավատացյալների բազմության միջով անցնելիս Հռոմի պապի գիրկը նետվեց փոքրիկ մի տղա, ու Կաթոլիկ եկեղեցու հովվապետը համբուրեց երեխայի ճակատը։ Հուզիչ տեսարանը պատկերող լուսանկարներն անմիջապես տարածվեց ու հայտնվեց լրատվական կայքերի առաջին էջերում։
Հռոմի պապի հետ հանդիպումից ժամեր առաջ Sputnik Արմենիան զրուցել է այդ փոքրիկի հետ։ Նա մոր ձեռքը բռնած բոլորից վաղ էր ժամանել հարմար տեղ գրավելու ու Հռոմի պապին տեսնելու համար։ Փոքրիկների երազանքներն ավելի շուտ են տիեզերք հասնում։ Մինչ ոստիկանության աշխատակիցները փակել էին մուտքը, մենք զրուցեցինք նրա հետ։ Հռոմի պապի մասին խոսելիս նրա աչուկները սկսեցին փայլփլել։
«Նա բարի պապիկ է»,-ասաց նա ու գնաց գրկելու Հռոմի պապին։
