Գոհար Սարգսյան, Sputnik.
Կողբացի 22/1 հասցեում ապրող Խանամիրյանների ընտանիքն իր տունը վաղուց չի վերանորոգում։ Վախից։ Ահուդողով սպասում են «Հին Երևան» նախագծի իրականացմանը` համոզված լինելով, որ տունը կճանաչեն պետության գերակա շահ, իսկ իրենց, գրոշներ տալով, դուրս կհանեն սեփական տնից։ Նանո Խանամիրյանը` ընտանիքի ավագը, հիշում է այն օրը, երբ առաջին անգամ հանդիպեց նախագծի ճարտարապետ Լևոն Վարդանյանին։ Դուրս եկավ բակ ու տեսավ մի մարդու, որը չափում էր իրենց տան ճակատի քարերը։
«Թերթերից մեկի 2012 թվականի համարում հանդիպումից օրեր անց կարդացի, որ Լևոն Վարդանյանը մեզ անվանել է քաղաքային հեղինակություն, որի վրա իշխանության ուժը չի պատում»,-ասաց Նանո Խանամիրյանը։
«Իմ պապն է այստեղ ապրել, հետո տունը ժառանգել ենք մենք։ Այստեղ 6 սեփականատեր կա։ Սա մեր տունն է, ու մենք կպաշտպանենք մեր իրավունքները։ Մի անգամ մեզ եկան ու ասացին, որ այստեղ բնակելի տարածք չի լինելու, վերածելու են զվարճանքի կենտրոնի։ Մենք մեր պահանջը չենք հրապարակելու։ Երբ իրական գնորդ կլինի, այն ժամանակ մեր առաջարկն ու պահանջները կքննարկենք։ Վաճառելու դեպքում ամեն քարը կգնահատենք, բա՜ անտիկվար է»,-ասաց շենքի բնակիչը։
«Ես միշտ նույն պատասխանն եմ տվել, այնտեղ բնակելի տարածք չկա, առևտրահասարակական կենտրոն է, այսինքն` ինքն իր էությամբ, եթե հուշարձաններ են հավաքվում Հանրապետության հրապարակի կողքը, փորձում են մի հատ հին թաղամաս հավաքել, չի կարող պատահել, որ այնտեղ բնակելի լինի»,-ասաց ճարտարապետը։
Նա կարծում է, որ իր նախագծով պաշտպանում ու պահպանում է Երևանում մնացած եզակի ու հին շենքերը։ Իսկ բազմաթիվ ընդդիմախոսներին, անգամ ճարտարապետներին, այլևս չի լսում, քանի որ, ինչպես խոստովանեց, հոգնել է նրանց նույն բանը բացատրելուց։
«Ինձ կոլեգաների կարծիքը չի հետաքրքրում, որովհետև նույն այդ կոլեգաներին ժամանակին փորձել եմ քրիստոնեաբար բացատրել` մասնագիտական առումով ես ինչ եմ անում։ Նրանք մինչև այսօր փորձում են հանրությանը թյուրիմացության մեջ դնել։ Ոչ ոք չի ասում, որ եթե Վարդանյան Լևոնը ժամանակին` 2005 թվականին, նախագծի առաջարկը չաներ, տեղում գոյություն ունեցող մոտ 14 հուշարձան քանդվում էր, օրինակ`Արամի 9-ը։ Ըստ նրանց` պետք է լիներ բուլվար ու ապակե բուդկաներ, դուք ուզու՞մ եք` իմ այդ կոլեգաներին նորմալ պատասխանեմ»,- ասաց Վարդանյանը։
Ճարտարապետը խոստովանում է, որ նախագծի իրականացման աշխատանքները շարունակաբար ձգձգվում են։ Հույս ունի 5 տարուց ծրագիրն ավարտված տեսնել։ Նույն` 5 տարվա ժամկետի մասին նա խոսել էր դեռևս 2014 թվականի վերջին։
Իսկ այն հարցին, թե ինչպես է պատկերացնում «Հին Երևանը» շենք-շինությունների անհամաչափությամբ, Լևոն Վարդանյանը պատասխանեց, թե դա իր ցանկությամբ չի եղել։ Նա հույս ունի, որ ցածրահարկ շինությունների կողքին վեր խոյացող բարձրահարկ շենքերը մի օր չեն լինի։
