ԵՐԵՎԱՆ, 26 օգոստոսի — Sputnik, Լաուրա Սարգսյան. Հայաստանի կրթության նախարար Լևոն Մկրտչյանը Հայաստանի դպրոցների տնօրենների հետ օգոստոսյան խորհրդակցության ժամանակ ասաց, որ այսօրվա կրթական համակարգում պետք է արմատական փոփոխություններ կատարել որակը բարելավելու համար:
«Ավագ դպրոցի վերջին` 12-րդ դասարանում մենք միայն երեք առարկա ենք թողել: Դրանք այն առարկաներն են, որոնք դպրոցականներն իրենք կընտրեն բուհ ընդունվելու համար: Հաջորդ քայլը կլինի կրեդիտային համակարգի ներդրումը», — ասաց Մկրտչյանը:
Նրա խոսքով` դպրոցականների հավաքած կրեդիտների քանակը թույլ կտա բուհում կրճատել ուսման տարիները, և ոմանք կկարողանան բակալավրիատն ավարտել 3 տարում:
«Առարկայական քննությունները կհանձնեն 11-րդ դասարանում, ինչը թույլ կտա 12-րդ դասարանում լիարժեք պատրաստվել բուհ ընդունվելուն»,- ասաց նախարարը:
Նրա կարծիքով` այսօր ավագ դպրոցն անարդյունավետ է գործում, ինչի պատճառով էլ ծնողները չեն վստահում կրթական այս ձևին։ Սակայն նոր համակարգին ամբողջությամբ անցում կատարելու համար ժամանակ է հարկավոր:
«Այդ փոփոխություններն առայժմ չեն անդրադառնա մեծ թվով աշակերտներ ունեցող դպրոցների վրա, իսկ դրանց թիվը Հայաստանում շատ է: Հետագայում մտադիր ենք լուծել նաև այդ խնդիրը», — վստահեցրեց նախարարը:
Մկրտչյանը նշեց, որ նոր ուսումնական տարում փոփոխություններ կկատարվեն «Բարձրագույն կրթության մասին» օրենքում, որի համաձայն` ուսանողը կարող է որոշակի թվով կրեդիտներ հավաքել (լրացուցիչ առարկաներ) և ընտրած մասնագիտության հետ մեկտեղ ստանալ նաև երկրորդ մասնագիտությունը:
Տարածաշրջանում կրթական այս ձևը նորություն չէ, և արդեն մի քանի տարի է` հաջողությամբ կիրառվում է հարևան Վրաստանում:
Այսօր որակավորում ունեցող մի շարք մասնագետներ չեն կարող դպրոցում դասավանդել մանկավարժական կրթություն չունենալու պատճառով: Նախարարի խոսքով` նոր համակարգը կլուծի նաև այս խնդիրը: Բարեփոխումներից մեկն էլ այն կլինի, որ թեստերից բացի, նաև բանավոր քննություններ կլինեն։
«Մենք որոշել ենք դպրոցներում վերականգնել բանավոր քննությունները: Դա պետք է, որպեսզի երեխայի անհատականությունն ու ստեղծագործական կարողությունները չճնշվեն», — ասաց Մկրտչյանը:
Նրա խոսքով` թեստային համակարգը արդիական է և միջազգային, սակայն բանավոր քննությունները թույլ կտան մտածել ու բացահայտել երեխայի կարողությունները:
Այսօր Հայաստանում գործում է շուրջ 1437 հանրակրթական ուսումնական հաստատություն, որոնցից 1 391-ը պետական են, 46-ը` մասնավոր: Դրանցից 493 հիմնական դպրոցներն են, 109-ը` ավագ, 811-ը` միջին, 17-ը քոլեջներ են:
