ԵՐԵՎԱՆ, 19 հոկտեմբերի — Sputnik. Հոկտեմբերի 19-ին շրջանների մեծ մասում սպասվում են տեղումներ, լեռնային գոտիներում, Լոռու, Տավուշի, Սյունիքի և Արցախի նախալեռնային հատվածներում՝ ձյան տեսքով, հայտնում են ՀՀ ԱԻՆ Հիդրոմետ ծառայությունից։
«Խորհուրդ է տրվում երթևեկել բացառապես ձմեռային անվադողերով»,- ասված է հաղորդագրությունում:
Հոկտեմբերի 20-ից շրջանների զգալի մասում տեղումները կդադարեն, բայց Լոռիում, Տավուշում, Սյունիքում և Արցախում ամպամածությունը, իսկ առանձին հատվածներում նաև թույլ տեղումները կպահպանվեն:
Հոկտեմբերի 20-23-ը սպասվում է առանց տեղումների եղանակ: Քամին կլինի արևմտյան՝ 3-8 մ/վ արագությամբ: Օդի ջերմաստիճանը հոկտեմբերի 19-ին էապես չի փոխվի, 20-22-ը կբարձրանա 4-6 աստիճանով:
Երևանում, ըստ կանխատեսման, հոկտեմբերի 19-ին սպասվում է անձրև, 20-23-ը սպասվում է առանց տեղումների եղանակ: Հոկտեմբերի 19-ին ջերմաստիճանը մայրաքաղաքում կլինի 12-14, իսկ հոկտեմբերի 20-ին արդեն` 15-17 աստիճան:
Նշենք, որ Հայաստանում ձյուն է տեղում արդեն երրորդ օրը։ Նախօրեին ձյան ծածկի առավելագույն բարձրությունը Գավառում հասել է 20սմ, Հրազդան, Ֆանտան, Ծաղկաձոր հատվածներում 15-18սմ: Երեկ կեսօրից հետո ցիկլոնի ուժը կրկնակի թուլացել է, ինչի արդյունքում թուլացել է նաև տեղումների ինտենսիվությունը, բայց դրանք ժամանակ առ ժամանակ կշարունակվեն նաև այսօր։
