15:49 23 օգոստոսի 2017
Ուղիղ եթեր
Մամուլ

Մամուլի տեսություն. Նախընտրական քաղաքական ու լրատվական դաշտի ռեստավրացիաները

© Sputnik/ Asatur Yesayants
Հասարակություն
Ստանալ կարճ հղումը
22 0 0

Ի՞նչ են գրում թերթերն այսօր։ Sputnik Արմենիան ներկայացնում է նոյեմբերի 23–ի մամուլի տեսությունը։

Հրապարակ. ԲՀԿ-ում ջերմ գրկախառնություններ են սպասվում

Թերթը գրում է, որ ԲՀԿ-ն առաջիկայում կուսակցության քաղխորհրդի նիստ է պլանավորել, որը կկայանա Մելիք-Ադամյանի վրա գտնվող կառավարության մեծ՝ 800 տեղանոց դահլիճում, մինչդեռ ԲՀԿ քաղխորհուրդը բաղկացած է 160 անդամից։

«Նախնական օրն էլ է որոշված՝ դեկտեմբերի 3-ը, բայց ասացին՝ դեռ կարող է փոխվել։ Նման ներկայացուցչական նիստ անելու նպատակը ԲՀԿ նախկին առաջնորդ Գագիկ Ծառուկյանի վերադարձի հետ է կապված։ ԲՀԿ քաղխորհուրդը միաձայն, առանց դեմերի կպահանջի նախկին նախագահի վերադարձը։ Ի դեպ, այդ օրը ԲՀԿ կվերադառնան բոլոր նեղացածներն ու հեռացածները»,- գրել է թերթը։

Հայկական ժամանակ․Կառավարությունը մոտ 19 միլիոնով մեքենայի 1 պահեստամաս է գնել

Թերթը գրում է, որ ՀՀ կառավարությունն այս տարի բավականին ուշագրավ մի գնում է նշել՝ 18 մլն 915 հազար դրամով մեքենայի մեկ պահեստամաս է ձեռք բերել: Փաստաթղթում նշված չէ, սակայն, թե դա ինչ պահեստամաս է և ինչ մեքենայի համար: 

«Հավանաբար կառավարությունն ինքը կպարզաբանի, եթե հարկ համարի: Այնուամենայնիվ, հնարավոր չէ պատկերացնել, թե մոտ 40 հազար դոլարով այդ ինչ պահեստամաս կարելի է ձեռք բերել, երբ այդ գումարով ամբողջական շքեղ մեքենա է հնարավոր գնել: Թեման զարգացնելով՝ կարող ենք չբացառել, որ այդ պահեստամասը կարող էր լինել թանկարժեք մետաղից, օրինակ, ոսկուց կամ թանկարժեք քարից՝ ադամանդից: Եվ որ այդ պահեստամասի գնման նպատակն այդ ծառայողական մեքենան թյունինգի ենթարկելն է: Ամեն դեպքում այս գնումը հաստատված է եղել նախկին վարչապետ Հովիկ Աբրահամյանի օրոք»,- գրել է թերթը:

Հրապարակ. Հանրայինի ռեստավրացիան շարունակվում է

Թերթը գրում է, որ Հանրային հեռուստաընկերության ռեստավրացիան շարունակվում է: Նախագահականի նոր «կարգադրիչ» Ալիկ Հարությունյանն առավելապես կենտրոնացած է Հ1-ի վրա, որի ռեյտինգն անչափ ցածր է, մանավանդ՝ քաղաքական հաղորդումների, թոք-շոուների մասով:

«Փորձ է արվում Հ1-ին վերադարձնել նախկին առաջատարի փառքը: Հարություն Հարությունյանի և Արտակ Հերիքյանի՝ «1-ին լրատվական» տեղափոխվելուց հետո կադրային «տարհանումները» շարունակվում են: Հունվարից կդադարեցվի Արմեն Աշոտյանի «Եռանկյունի» հաղորդումը: Թեև պաշտոնական բացատրությունն այն է, որ նախընտրական փուլում ԵԱՀԿ/ԺՀՄԻԳ-ը մոնիտորինգի տակ է պահելու թիվիները, և ՀՀԿ փոխնախագահի կողմից հաղորդում վարելը ոչ կոռեկտ է, բայց իրականում այդ հաղորդումից դժգոհ է Ալիկ Հարությունյանը, կարծում է, որ այն չի ստացվել: Իսկ Աշոտյանին զբաղմունք կգտնեն՝ ՀՀԿ գրասենյակում, քարոզչության թեմաներում: Ի դեպ, Հանրայինում կհայտնվեն նոր դեմքեր, օրինակ՝ «Երկիր մեդիայում» վերջերս նախարարների հետ զրույցաշար սկսած Ագնեսա Խամոյանը»,- գրում է թերթը:

Փաստ. Կառավարությունը «գազ» է տալիս գազալցակայաններին

Թերթը գրում է, որ հայաստանյան գազի լիցքավորման կայանների բավականաչափ կայացած շուկային լուրջ վտանգ է սպառնում։ Պարզվում է, որ մեր «գազային» կառավարության առաջնահերթություններից մեկը այդ շուկայում տոտալ վերահսկողություն սահմանելն է, և արդեն սկսվել են ստուգումները և շրջայցերը ԱԳԼՃԿ-ներ։

««Փաստ»-ի տեղեկություններով` ստուգողները ցուցումներ են ստացել ամենակրկիտ ձևով ստուգումներ անցկացնել և անհապաղ տուգանել այն սեփականատերերին, ովքեր «չուժոյ» են։ Հրահանգվել է տուգանել ընդհուպ մինչև 100 մլն. դրամ, ինչը նշանակում է, որ այդ տուգանվող լցակայանները պարզապես կփակվեն։

Առավոտ. Արա Աբրահամյանի «դիպլոմատիկ պասպորտը»

Թերթը գրում է, որ Ռուսաստանի հայերի միության նախագահ Արա Աբրահամյանի՝ կարմիր համարանիշներով մեքենան սոցցանցերում քննարկման առարկա էր դարձել։ Լուրեր էին շրջանառվում, որ նա մյուս փողատերերից հետ չմնալու համար գնել է այդ դիվանագիտական համարները։

«Այս առնչությամբ «Առավոտ»-ի հարցին Արա Աբրահամյանը պատասխանել է. «Դուք մոռացե՞լ եք, որ ես բարի կամքի դեսպան եմ։ ՄԱԿ-ի, ՅՈՒՆԵՍԿՕ-ի բարի կամքի դեսպան եմ, ինձ ունեմ դիպլոմատիկ պասպորտ։ Ես բոլոր Ռուսաստանում էլ եմ ման գալիս, Ամերիկայում, Ֆրանսիա, ամեն մի երկրում։ Եթե դեղին գույնի տան, դեղին գույնով կքշեմ, սպիտակ՝ սպիտակ։ Բայց դա է իմը, ես դիպլոմատիկ պասպորտով եմ գալիս։ Կարող եք մի հատ ձեր պոգրանիչնիկ սահմանապահներին էլ հարցնել՝ «ո՞վ կա, իմ պասպորտը ո՞ւմ մոտ ա», որ ցուցադրի իմ անձնագիրը»»,- գրել է թերթը:

Գլխավոր թեմաներ