Լաուրա Սարգսյան, Sputnik.
Դեկտեմբերի 3-ը Աստվածամուխ Սուրբ գեղարդի ուխտի օրն է: Այսօր Սուրբ գեղարդը կբերվի Մայր տաճար ու այնտեղ կմնա մինչև ուշ երեկո:
Համարվում է, որ գեղարդին հպվելը ոչ միայն ուժ է տալիս, այլև տարբեր հիվանդություններ է բուժում։
«Թե՛ հայերը, թե՛ օտարները, երբ այցելում են թանգարան, Սուրբ գեղարդին դիպչելու ցանկություն են ունենում: Բնականաբար, մենք ամեն անգամ մասունքը դուրս բերելու հնարավորություն չունենք: Եվ ահա այս ամենը հիմք հանդիսացավ, որ Ամենայն Հայոց Կաթողիկոսի հայրապետական սրբատառ կոնդակով հայոց եկեղեցու հիմնադիրներ սուրբ Թադեոս և սուրբ Բարդուղիմեոս առաքյալների տոնը հռչակվի Աստվածամուխ Սուրբ գեղարդի ուխտի օր», — Sputnik Արմենիայի թղթակցի հետ զրույցում ասաց Տեր Ասողիկ քահանա Կարապետյանը։
Ըստ ավանդույթի` Սուրբ գեղարդը Հայոց աշխարհ է բերել Քրիստոսի 12 աշակերտներից մեկը՝ սուրբ Թադեոս առաքյալը: Սուրբ գեղարդն այն նիզակի ծայրն է, որով հռոմեացի զորականը՝ Ղունկիանոս հարյուրապետը, խոցեց Հիսուս Քրիստոսին` խաչի վրա:
Կաթողիկոսի կոնդակի համաձայն` այդ օրը գեղարդը հանդիսավորությամբ դուրս է բերվում Մայր տաճարից, և մարդիկ կարողանում են դիպչել Սուրբ գեղարդին ու իրենց աղոթքն ուղղել առ Աստված:
«Արդեն երրորդ տարին է, որ մենք պատրաստվում ենք Սուրբ գեղադրի ուխտին: Մարդիկ գոհունակությամբ ընդունեցին այդ տնօրինությունը, քանի որ այսօրվա ոչ հանգիստ, աշխարհում հոգևոր նորոգության ևս մեկ աղբյուր մատչելի դարձավ նրանց համար»,- ասաց նա։
Քահանան կարծում է, որ սա կարևոր իրադարձություն է ոչ միայն հայերի, այլև՝ ամբողջ քրիստոնյա աշխարհի համար, քանի որ Սուրբ գեղարդը համաքրիստոնեական մասունք է։ Ուխտագնացությունը մարդկանց նոր հոգևոր փորձ ստանալու և գիտակցությունը հոգևոր սնունդով հագեցնելու ևս մեկ հնարավորություն է տալիս:
Գեղարդի շուրջ մի շարք լեգենդներ և զարմանալի պատմություններ են հյուսվել։ Ավանդույթի համաձայն` այն բազում մարդկանց կյանքեր է փրկել, կանխել համաճարակի տարածումը, այդ պատճառով Սուրբ գեղարդին դիպչել են ցանկանում նաև մարդիկ, որոնք ֆիզիկական կամ հոգեկան խնդիրներ ունեն:
«Հայոց եկեղեցու հիմնադիրներ սուրբ Թադեոս և սուրբ Բարդուղիմեոս առաքյալների տոնը շարժական է, սովորաբար նշվում է նոյեմբերի վերջին կամ դեկտեմբերի սկզբին»,- ասաց քահանան։
Սուրբ գեղարդի մոտ են գալիս ոչ միայն տեղի բնակիչներն ու Հայաստանի քաղաքացիները, այլև՝ զբոսաշրջիկները։
Տեր Ասողիկ քահանա Կարապետյանը խորհուրդ է տալիս բոլորին, որ այդ օրը հոգեպես պատրաստված գան Մայր տաճար, ներկա լինեն առավոտյան պատարագին, այնուհետև հպվեն Սուրբ գեղարդին, աղոթեն և մաքրվեն հոգեպես։
Հարյուրամյակներ շարունակ գեղարդը պահվել է Այրիվանքում (Գեղարդում) և միայն 1760 թվականին է բերվել Էջմիածին։
