ԵՐԵՎԱՆ, 23 դեկտեմբերի — Sputnik. Հայ դպրոցականները չափազանց ծանրաբեռնված են, և պետք է վերանայել կրթական ծրագրերը, հայտարարեց Հայաստանի կրթության նախարար Լևոն Մկրտչյանը` ամփոփելով տարվա արդյունքները։
Ամենածանրաբեռնվածն ավագ դասարաններն են, և հենց այդ պատճառով էլ ոլորտի մասնագետները կամփոփեն դեկտեմբերյան քննությունների արդյունքները, որպեսզի հասկական, թե ինչ դրական և բացասական արդյունքներ են գրանցվել։ 2016թ-ի ընթացքում գերատեսչությունը հիմնական շեշտը դրել է ավագ դպրոցի կրթական համակարգի վրա։
Նախարարը կարծում է, որ հայկական դպրոցների աշակերտները չափազանց ծանրաբեռնված են։ Եվ եթե եվրոպական հանրակրթական դպրոցներում անցնում են 14 առարկա, ապա մեզ մոտ դրանց քանակը գերազանցում է երկու տասնյակը։ Մկրտչյանի խոսքով` այդ առարկաները պետք է համակարգել, որպեսզի մենք աշխատենք նոր համակարգով։ Գերատեսչության ղեկավարը նշեց 12-րդ դասարանների ծրագիրը թեթևացնելու և 4-5 առարկա թողնելու կարևորությունը, ինչը մեծ ծանրաբեռնվածություն չի լինի դիմորդի համար։
«Ավելի ճիշտ կլիներ արդեն հաջորդ տարվանից այնպես անել, որ հանրակրթական ծրագիրն ավարտվի արդեն 11-րդ դասարանում, իսկ 12-րդ դասարանում երեխաները կարողանան առարկաներն ընտրել ըստ իրենց հայեցողության և նախապատվության», — ասաց Մկրտչյանը։
Մկրտչյանը կարծում է, որ հարուստ երկրներում կա միայն մի խնդիր` կրթության որակը, իսկ Հայաստանի նման երկրներում կրթության ոլորտի պատասխանատուների ուսերին է ընկնում նաև սոցիալական պատասխանատվության բեռը։ Միաժամանակ նա նշեց, որ «եթե ինչ-որ երկրում» հասարակությունը չի բողոքում կրթական համակարգից, նշանակում է, զարգացման հեռանկարներ չկան»։
