20:11 27 հոկտեմբերի 2020
Ուղիղ եթեր
  • USD493.18
  • GBP642.22
  • EUR582.25
  • RUB6.44
Հասարակություն
Ստանալ կարճ հղումը
92950

Արդեն երկրորդ տարին է` գյումրեցի երիտասարդներն իրենց ձմեռային ժամանցն ակտիվ անցկացնելու յուրօրինակ տարբերակ են գտել: Ամեն ինչ սկսվեց այն պահին, երբ գյումրեցու արյունը խաղաց ու թասիբը խոսեց՝ ինչո՞ւ հասնել Երևան սահադաշտում մի քանի ժամ սահելու համար:

Արմենուհի Մխոյան, Sputnik.

Գյումրեցի երիտասարդները մտածեցին, որ հայրաքաղաքը մայրաքաղաքից պակաս չէ, ու որոշեցին՝ Գյումրին սահադաշտ է ունենալու:

Եթե անցած տարի քաղաքում երիտասարդների նախաձեռնությամբ ստեղծված սահադաշտը միայն ծայրամասային «Անի» թաղամասում էր, ապա այս տարի երկրորդ սահադաշտը հայտնվեց նաև կենտրոնական հատվածում:

«Սահադաշտից օգտվողների թիվը պարբերաբար ավելանում է: Համոզված եմ՝ շատերը դեռ չգիտեն, որ Գյումրիում երկու սահադաշտ կա, այլապես չմուշկով սահելու ցանկություն հայտնողների թիվն ավելի շատ կլինի»,- նշում է նախաձեռնության հեղինակներից մեկը` Գոռ Թորոսյանը` խոստովանելով, որ ժամանակին ինքն էլ էր այն երիտասարդների ցանկում, որոնք սահելու համար Երևան էին մեկնում։

Գոռն ասում է, որ սահադաշտ պատրաստելը հեշտ գործ չէ ու պատմում է դժվարությունների մասին։

«Բոլորին թվում է, թե սահադաշտ սարքելը շատ հեշտ է, բայց դա այդպես չէ: Սահադաշտը շերտ-շերտ ենք անում, իսկ յուրաքանչյուր շերտն իր դժվարությունն ունի: Եղել են պահեր, երբ հաստ շերտը սարքելու համար գիշերն ենք աշխատել, երբ դրսում 30 աստիճան ցուրտ էր»,- անկեղծանում է Գոռ:

  • Գոռ Թորոսյան
    Գոռ Թորոսյան
    © Sputnik / Armenuhi Melkonyan
  • Սահադաշտի նախաձեռնողները
    Սահադաշտի նախաձեռնողները
    © Sputnik / Armenuhi Mkhoyan
  • Սահադաշտ ունենալը հեշտ գործ չէ
    Սահադաշտ ունենալը հեշտ գործ չէ
    © Sputnik / Armenuhi Mkhoyan
  • Սահադաշտ եկածները տուն կվերադառնան միայն տղաների ձեռքով պատրաստված «շերտած» կարտոֆիլը համտեսելուց հետո
    Սահադաշտ եկածները տուն կվերադառնան միայն տղաների ձեռքով պատրաստված «շերտած» կարտոֆիլը համտեսելուց հետո
    © Sputnik / Armenuhi Mkhoyan
1 / 4
© Sputnik / Armenuhi Melkonyan
Գոռ Թորոսյան

Ի դեպ, սահադաշտերից օգտվելը բավական մատչելի է՝ ցանկացողները չմուշկները կարող են վերցնել` կես ժամ սահելու համար մուծելով 500, իսկ 1 ժամի համար 800 դրամ, իսկ «Անի» թաղամասի սահադաշտից անվճար կարող են օգտվել գիշերօթիկ հաստատության բոլոր 105 սաները, ընդ որում` երբ ու որքան ուզեն, իսկ ֆիզկուլտուրայի դասերին այս երեխաները չմուշկներով սահել են սովորում:

Ինչպես անցած տարի, այս տարի ևս չմուշկների վարձակալման գումարի մի մասը երիտասարդները կրկին կօգտագործեն բարեգործական նպատակներով:

Երիտասարդները սահադաշտից օգտվողների համար նաև անակնկալ են պատրաստել՝ սահադաշտ եկածները տուն կվերադառնան միայն տղաների պատրաստած «շերտած» կարտոֆիլը համտեսելուց հետո:

Սա տարիների ընթացքում գյումրեցի երիտասարդների առաջին ու միակ նախաձեռնությունը չէ, նրանք ապացուցել են, որ իրենց հայրենի քաղաքի տերն են ու շատ հարցեր կարող են ինքնուրույն լուծել, իսկ իշխանություններին էլ ստիպում են շատ հարցերի շուրջ հաշվի նստել իրենց հետ:

Թոռնուհուն սահադաշտ բերած պապիկը հավաստում է. «Մեր գյումրեցի երիտասարդները շատ լավն են։ Էսպես որ գնաց, մտքներին դնեն, մինչև Մոսկվա մետրո էլ կգցեն»:

Գյումրեցի երիտասարդները վստահեցնում են` 2017 թվականին քաղաքում նոր անակնկալներ կլինեն ու լավ գաղափարներ կյանքի կկոչվեն:

© Sputnik / Արմենուհի Մխոյան
Գյումրեցիները երկու սահադաշտ ունեն

Գլխավոր թեմաներ