ԵՐԵՎԱՆ, 1 փետրվարի — Sputnik. 2017թ-ից սոցիալական ապահովման պետական ծառայությունում ներդրված նոր համակարգը քաղաքացիներին կազատի ավելորդ քաշքշուկից: Այս մասին այսօր լրագրողներին հայտնեց Աշխատանքի և սոցիալական հարցերի նախարար Արտեմ Ասատրյանը: Նոր համակարգը հնարավորություն կտա կենսաթոշակի, նպաստի չափի մասին տեղեկանքները ստանալ սոցիալական ապահովման պետական ծառայության ցանկացած տարածքային բաժնից կամ կենտրոնական գրասենյակից ընդամենը 15 րոպեում՝ նախկին 5-7 օրերի փոխարեն:
«Բնականաբար, հասկանում ենք, որ երբ քաղաքացիները որևէ տեղեկատվության կարիք ունեն, և կա ժամանակի խնդիր, միշտ առաջանում են տարբեր տիպի քաշքշուկներ, խնդիրներ, որոնք լուծելու համար տարբեր անձանց են փորձում գտնել, միջնորդել, բարեխոսել, որ այդ տեղեկատվությունը հնարավորինս շուտ տրամադրվի: Այս քայլով, փաստորեն, քաղաքացին դիմելուց հետո 10-15 րոպեում կարող է ստանալ անհրաժեշտ տեղեկանքը»,- ասաց նախարար Արտեմ Ասատրյանը:
Ի դեպ, նոր կարգը քաղաքացուն ազատում է նաև լրացուցիչ տեղեկատվության համար Ազգային արխիվ այցելելու անհրաժեշտությունից ու դրա դիմաց պահանջվող վճարում կատարելուց: Տեղեկատվության փոխանակումն այսուհետ քաղաքացու փոխարեն կկատարեն սոցապ ծառայության և ազգային արխիվի աշխատակիցները: Ընդ որում՝ անվճար:
Այս բարեփոխումները, նախարարի համոզմամբ, կնպաստեն նաև համակարգից կոռուպցիոն ռիսկերի վերացմանը:
