ԵՐԵՎԱՆ, 24 փետրվարի — Sputnik. Հայաստանում ագրոտուրիզմը ակտիվ զարգացում է ապրում, և այն գրավում է հիմնականում եվրոպացի ճանապարհորդներին, Sputnik Արմենիայի հարցին ի պատասխան ասաց «ԼՈՌԵ» զբոսաշրջային կազմակերպությունների խմբի հիմնադիր Վլադիմիր Գևորգյանը։
Նրա խոսքով` ՄԱԿ-ը հատուկ ծրագիր է մշակել, որն ուղղված է հայկական գյուղերի զարգացմանը։ Ծրագրի իրականացումն անկասկած կնպաստի նաև ագրոտուրիզմի զարգացմանը։
«Այս ծրագրի շրջանակում երեք տարվա ընթացքում երկրի հյուսիսային և հարավային շրջաններում համապատասխան նախագծեր են իրականացվելու, որոնց արդյունքում Հայաստանում կլինեն գյուղեր, որոնք պատրաստ կլինեն ընդունել ագրոտուրիստների», — Sputnik Արմենիա մամուլի կենտրոնում ասաց Գևորգյանը։
Նրա խոսքով` ագրոտուրիզմը գյուղացիներին հնարավորություն կտա գումար աշխատել, ինչպես նաև իրենց ներդրումն ունենալ գյուղի և գյուղական ենթակառուցվածքների զարգացման գործում։
«Գյուղական զբոսաշրջությունն օտարերկրացիներին գրավում է իր կոլորիտով։ Օրինակ` Գառնիում և Գեղարդում կարելի է տեսնել, թե ինչպես են լավաշ թխում, պանիր պատրաստում և այլն», — ավելացրեց նա։
Գավառում կարելի է հետևել տեղական գաթայի և փախլավայի պատրաստման գործընթացին, հետո էլ համտեսել դրանք։
«Զբոսաշրջիկներից շատերին դուր է գալիս տոլմայի պատրաստման գործընթացը, նրանք էլ հաճույքով միանում են տոլմա պատրաստողներին», — ասաց նա։
Պետք չէ մոռանալ նաև Արենի գյուղի մասին, որտեղ, Գևորգյանի խոսքով, կարելի է ոչ միայն հայկական գինի համտեսել, այլև տեսնել պատրաստման գործընթացը։
