ԵՐԵՎԱՆ, 24 փետրվարի — Sputnik. Հայաստանը բազմաթիվ ձեռքբերումներ ունի, սակայն գլխավորը նպատակասլաց երիտասարդությունն է, որը կարող է փոխել երկրում տիրող իրավիճակը։ Այդ մասին Sputnik Արմենիայի մամուլի կենտրոնում կայացած մամուլի ասուլիսում ասաց INTO համալսարանների ցանցի ընդունելության հարցերի համակարգող Քրիստինա Կուշնիրովան։
«Ես հաճախ եմ լինում Հայաստանում և գործի բերումով շփվում եմ հայ ուսանողների հետ, նրան շատ պատրաստված են և անգլերենի բարձր մակարդակ ունեն», — ասաց Կուշնիրովան։
Նրա խոսքով` հայ երիտասարդները ձգտում են երկրում տիրող իրավիճակը փոխել բնակչության կրթվածության, բիզնեսի, որոշակի գիտական նախագծերի մակարդակը բարձրացնելու ճանապարհով։ Հենց այդ նպատակով էլ նրանք ձգտում են կրթություն ստանալ արտասահմանում։
Քրիստինան Երևան է ժամանել` դիմորդների, ուսանողների և բոլոր ցանկացողների համար կոնկրետ առաջարկներով, ինչպես նաև արտասահմանում որակյալ կրթություն տրամադրելու պատրաստակամությամբ։ Կրթությունը բյուջետային չէ և նախատեսված է նրանց համար, ովքեր որոշակի միջոցներ ունեն։
«Ուսանողները սովորում և բնակվում են համալսարանների կամպուսներում, ինչի շնորհիվ նրանք լիովին հարմարվում են ուսանողական կյանքին։ Սովորողները դառնում են բուհի մասը, նրանց առջև բացվում են ուսումնական հաստատության հնարավորությունները», — ասաց Կուշնիրովան։
Այդ նախագծերում կարևորագույն բաղադրիչն այն է, որ սովորողներն անվճար ստաժավորում անցնելու և, որպես արդյունք, աշխատանքի տեղավորվելու հնարավորություն են ունենում։
Glion և Les Roches համալսարանների ընդունելության հարցերի համակարգող Անտոն Կոտովն իր հերթին առաջարկում է հայ ուսանողներին հմտություններն ու գիտելիքները կատարելագործել բիզնես ոլորտում` սովորելով Մեծ Բրիտանիայի, Չինաստանի և այլ երկրների առաջատար բուհերում։
«Մենք մեր ուսանողներին օգնում ենք միջազգային կարիերա ստեղծելու հարցում։ Նրանք հետագայում դառնում են միջազգային ընկերությունների առաջնորդներ, թոփ մենեջերներ», — ասաց Կոտովը։
Նա Հայաստանը բավական հետաքրքիր երկիր է համարում։ Կոտովը Երևան է ժամանել, որպեսզի ուսանողներին պատմի այն բուհերի մասին, որոնք ներկայացնում է ինքը։
Աշխարհի առաջատար բուհերի ուսանող դառնալու մասին մանրամասն տեղեկություն կարելի է իմանալ` այցելելով Երևանում անցկացվող «Համաշխարհային կրթության բաց դռների օր» ամենամյա հանդիպմանը, որին կմասնակցեն ԱՄՆ-ի, Մեծ Բրիտանիայի, Չինաստանի, Իռլանդիայի, Հոլանդիայի, Կանադայի, Չեխիայի, Իսպանիայի, Շվեյցարիայի և Մալթայի վարկանիշային համալսարանների, IB դպրոցների և ամառային ճամբարների ներկայացուցիչներ։ Նրանք մասնակիցներին մանրամասն տեղեկություն կտրամադրեն բակալավրի, մագիստրոսի, դոկտորական ծրագրերի, կրթաթոշակների և ամառային ծրագրերի վերաբերյալ:
Միջոցառման կազմակերպիչն է «Լոնդոն Այ» միջազգային ուսումնական կենտրոնը, որը հիմնվել է 2011թ-ին։ Կենտրոնի գործադիր-տնօրեն Գայանե Եղիազարյանը կարծում է, որ կենտրոնը հարթակ է դիմորդներին և ուսանողներին անվճար խորհրդատություն տրամադրելու և տարբեր բուհերի ներկայացուցիչների հետ կապեր հաստատելու համար։
