ԵՐԵՎԱՆ, 13 մարտի — Sputnik. Ռուսաստանի հարավային մայրաքաղաքում հայկական ազգային պարերի դպրոց է գործում։ Այս մասին հայտնում է kubantv.ru-ն։
«Հնագույն ժողովուրդն իր պարային ավանդույթներն ունի։ Ամեն պարը որոշակի պատմություն է պատմում։ Առայժմ միայն հայերն են դպրոց հաճախում, սակայն դպրոցի դռները բաց են նաև այլ ազգերի ներկայացուցիչների առաջ»,- գրում է կայքը։
Պատանիներն ու աղջիկները` ուս ուսի տված, ազգային պարեր են պարում դհոլի ու զուռնայի տակ։ 14-24 տարեկան 20 սաները ռազմական պարեր են սովորում։
«Մեր պատմության ընթացքում մենք գրեթե միշտ պատերազմել ենք։ Մեզ հետ են եղել նաև մեր քույրերը, մայրերն ու դուստրերը։ Այդ պատճառով էլ ռազմական պարերին ոչ միայն տղաներն են մասնակցում, այլ նաև` աղջիկները»,- պատմել է պարուսույց Հարություն Մարգարյանը։
Դպրոցն առայժմ 2 պարուսույց ունի, սակայն նախատեսվում է պարուսույց հրավիրել նաև Հայաստանից:
