ԵՐԵՎԱՆ, 24 մարտի — Sputnik. Հայաստանում ապրող 3500 խուլերը մինչ օրս զրկված էին իրենց հասանելի լեզվով հոգևոր տեսանյութերից: Բացը լրացնելու համար Հայ առաքելական եկեղեցին ու Հայաստանի Աստվածաշնչային ընկերությունը խուլերի համար տեսաաստվածաշունչ են հրատարակել: Տեսանյութերի ստեղծման գործընթացը տարիներ է տևել: Այդ ընթացքում պարզվել է, որ ժեստերի լեզվում նույնիսկ հոգևոր տերմիններ չկան: Իսկ հայ հոգևորականները խուլերի հետ ստիպված են լինում հատուկ թարգմանիչների միջոցով շփվել:
Արարատյան Հայրապետական թեմի տեղեկատվական բաժնի հոգևոր համակարգող Տեր Եսայի քահանա Արթենյանը պատմում է, որ խուլերի համայնքի հետ շփման ընթացքում սովորել և այսօր արդեն տիրապետում է ժեստերի լեզվին, նա այդ լեզվով խոսող միակ հայ հոգևորականն է:
«Յուրաքանչյուր մարդ իրավունք ունի Աստվածաշունչը կարդալ մայրենի լեզվով: Ժեստերի լեզուն խուլերի մայրենի լեզուն է»,- ասում է Տեր Եսային:
Առաջին տեսասկավառակը, որը լույս է տեսել միայն 500 օրինակով, ներկայացնում է միայն Հին Կտակարանը: Բայց հեղինակները խոստանում են մինչև հաջորդ տարի ոչ միայն ավելացնել արդեն պատրաստի տեսաշարի օրինակները, այլև հրատարակել Նոր Կտակարանի տարբերակը:
«Մարդը կանգնած ժեստերի լեզվով փոխանցում է Աստվածաշնչի տվյալ հատվածի տեքստը: Էկրանի մյուս կողմում նույն թեմայի շուրջ նկարներն են, իսկ ներքևում նույն տեքստը նաև գրվում է: Այսինքն՝ էկրանին միանգամից երեք կոմպոնենտ կա, որոնք հրաշալի փոխլրացնում են միմյանց»,- պատմում է Տեր Եսային:
Տեսաշարը համալրվել է նաև երաժշտությամբ, որպեսզի խուլերից բացի այն հետաքրքիր լինի նաև նրանց ընտանիքների լսողական խնդիր չունեցող անդամներին:
Տեսասկավառակի ստեղծման աշխատանքներում ներգրավված է եղել նաև խուլերի համայնքի անդամ Գրետա Ավագյանը, ում խոսքով, տեսասկավառակի կարևոր առաքելությունն Աստծո խոսքը չլսող մարդկանց փոխանցելն է:
Տեսասկավառակի ստեղծման գործընթացին աջակցած Հայաստանի Աստվածաշնչային ընկերության ծրագրերի տնօրեն Արշավիր Գաբուջյանն էլ համոզմունք հայտնեց, ականջով խուլ մարդկանց Աստծո խոսքը հասցնելը դժվար չէ: «Շատ ավելի դժվար է հոգով ու մտքով խուլերին լսելի դարձնելը»:
Սկավառակները վաճառքի ենթական չեն, դրանք Հայ Առաքելական եկեղեցին իր սպասավորների միջոցով բաժանելու է մայրաքաղաքում ու մարզերում բնակվող խուլերին: