ԵՐԵՎԱՆ, 19 ապրիլի — Sputnik. Ապրիլի 22-ին, ժամը 15:00-17:00-ն, Հովհաննես Շարամբեյանի անվան ժողովրդական ստեղծագործության կենտրոնում տեղի կունենա Մեծ եղեռնի 102-րդ տարելիցին նվիրված «Հուշաքարտեզ» խորագրով միջոցառումը։ Այս մասին հայտնում է մշակույթի նախարարության մամուլի ծառայությունը։
Միջոցառմանը կմասնակցեն 1915 թվականի ցեղասպանությունը վերապրածների ժառանգները՝ Հայաստանից և սփյուռքից: Հուշ-ցերեկույթի ընթացքում մասնակիցները կներկայացնեն արհավիրքին դիմակայած իրենց նախնիների պատմությունները:
«Տարեցների զրույցներին զուգահեռ՝ մասնակից երեխաները կգունազարդեն պատմական Հայաստանի քարտեզը: Հուշի ծվեններից ուրվագծված սավան-քարտեզի յուրաքանչյուր պատառիկ կխորհրդանշի մի ընտանիքի (տոհմի) պատմությունն ու անունը»,- նշված է հաղորդագրության մեջ:
Այս ստեղծագործությունը կարող է համարվել մեր օրերում ստեղծված յուրահատուկ փաստաղբյուր և ազգային հիշողության պահպանման ինքնատիպ դրսևորում:
Միջոցառման նախագծի հեղինակն է արվեստաբան-դիզայներ Աննա Ասլանյանը:
