ԵՐԵՎԱՆ, 23 հունիսի — Sputnik. Երեխաներին դպրոցական պայուսակներով և գրենական պիտույքներով ապահովելու ծրագիրը մեկնարկել է հունիսի 15-ին և կտևի մինչև հունիսի 30-ը: Այս մասին հայտնում է Երևանի քաղաքապետարանի մամուլի ծառայությունը։
Դպրոցական առաջին նվերները երեխաները ստանում են մանկապարտեզի ավարտական հանդեսների ժամանակ, որոնցից մի քանիսին ներկա է գտնվել և փոքրիկներին բարեմաղթանքի խոսքեր է հղել նաև Երևանի քաղաքապետարանի հանրակրթության վարչության պետ Աննա Ստեփանյանը: Շնորհակալություն հայտնելով մանկապարտեզի տնօրեններին և մանկավարժներին՝ քրտնաջան աշխատանքի համար, Աննա Ստեփանյանը կարևորել է երեխաների կրթության հանդեպ ուշադրությունն ու հետևողական վերաբերմունքը:
«Վստահ եղեք, որ մայրաքաղաքի նախակրթարանները Երևանի քաղաքապետարանի և անձամբ քաղաքապետ Տարոն Մարգարյանի մշտական ուշադրության կենտրոնում են, և համոզված եմ, որ այդ ուշադրության արդյունքը բոլորիդ է տեսանելի: Հուսով եմ, որ մեր այս փոքրիկները, ովքեր վաղն արդեն դպրոց կգնան, շատ լավ կսովորեն ու կավելացնեն գիտելիքների այն պաշարը, որը ստացել են մանկապարտեզներում»,- նշել է Աննա Ստեփանյանը:
Հիշեցնենք, որ այս տարի ևս մանկապարտեզն ավարտող երեխաներին տրամադրվում են շուրջ 10000 պայուսակներ՝ 16 անուն դպրոցական պարագաներով:
