ԵՐԵՎԱՆ, 3 հուլիսի — Sputnik. Կարմիր խաչի միջազգային կոմիտեի` Բաքվի պատվիրակության աշխատակիցներն այցելել են ադրբեջանական կողմում հայտնված ու ազատազրկված ՀՀ քաղաքացի 43-ամյա Զավեն Կարապետյանին: Այս մասին Sputnik Արմենիային հայտնեց Կարմիր խաչի երևանյան գրասենյակի ներկայացուցիչ Զառա Ամատունին:
Թե ինչ են արձանագրել ՀՀ քաղաքացու հետ հանդիպման ընթացքում, և ինչ վիճակում է եղել նա, մանրամասներ չեն նշվում։
«Հանրային հարթակում այլ տեղեկություններ չեն հրապարակվում»,- ասաց Ամատունին։
Հիշեցնենք, որ հունիսի 21-ին ադրբեջանական կողմը հայտարարություն էր տարածել Զավեն Կարապետյանի գերեվարության մասին։ Ավելի ուշ հրապարակվեց նաև նրա հարցաքննության տեսանյութը։
Որոշ ժամանակ անց հայաստանյան լրատվամիջոցները պարզեցին, որ Զավեն Կարապետյանը զինված ուժերում չի ծառայել, քանի որ ունի հոգեկան առողջության հետ կապված խնդիրներ։ Մշտական բնակության վայր չունի, մեծացել է մանկատանը գրանցված է Վանաձորի ծերանոցի հասցեում։
