ԵՐԵՎԱՆ, 20 հուլիսի – Sputnik. Միասնական երթուղային ցանցի ստեղծման գաղափարին կառավարությունը հավանություն տվեց։ Այսօր գործադիրի նիստի ժամանակ նախարար Վահան Մարտիրոսյանը շեշտեց, որ հանրապետությունում պետական ու տեղական ինքնակառավարման մարմիններն են ձևավորում երթուղային ցանցը։ Նա նշեց, լիարժեք չի ապահովվում փոխադրումների արդյունավետությունը։
«Չվացուցակներն այնպես են կազմվում, որ հնարավոր չի լինում ապահովել գյուղերից մարզկենտրոն, խոշոր քաղաքներ, Երևան արդյունավետ փոխադրումը»,–ասաց նախարարը։
Վարչապետ Կարեն Կարապետյանն էլ փորձեց ճշտել` ի՞նչ է իրենից ենթադրում միասնական երթուղային ցանցը։
Նախարարն էլ բացատրեց, որ ամեն մարզ պետք է ունենա մեկ միասնական օպերատոր, կգտնվեն օպտիմալ երթուղիներ, ՀՀ բոլոր համայնքները կապահովվեն տրանսպորտային սպասարկմամբ, կբարելավվի վերահսկողության մակարդակը։
Կառավարության նիստից հետո նախարար Մարտիրոսյանը հայտնեց` օպերատորների ընտրության համար կհայտարարվի մրցույթ, որին կկարողանան մասնակցել նաև միջազգային օպերատորները։ Կարևոր կետերից է տրանսպորտի կառավարման համակարգի ստեղծումը, երբ մոնիտորների միջոցով կհետևեն, թե որ համայնքում ինչ երթուղի է աշխատում, ավտոբուսը որ կանգառում է և ուր է հասել։
«Այսօր շատ համայնքներ կային, որոնք չէին սպասարկվում։ Երբ մենք ուսումնասիրեցինք, այդ համայնքները 260–ն էին, այսօր` 100–105-ը»,–ասաց նախարարը։
Վահան Մարտիրոսյանը ներդրումների չափի մասին չխոսեց, քանի որ գոնե այս պահին անհայտ է, թե որ համայնքում ինչ տեսակի ավտոբուսներ կգործեն։
Sputnik Արմենիայի այն հարցին, թե արդյո՞ք գծատերերի հետ խնդիրներ չեն առաջանա` հաշվի առնելով նրանց դիրքը, Մարտիրոսյանը հարցով պատասխանեց, կարճ ու կոնկրետ` մենք ուզու՞մ ենք մի բան փոփոխել։
