ԵՐԵՎԱՆ, 15 օգոստոսի — Sputnik. Նիդեռլանդների իշխանությունները որոշել են Հայաստան արտաքսել հայ կնոջը՝ առանց նրա երկու` 11 և 12 տարեկան երեխաների։ Այս մասին գրում է իսպանական La Vanguardia կայքը:
«Մենք երբեք չէինք բախվել նման խնդրի, որ մայրը արտաքսվի, իսկ երեխաները մնան Հոլանդիայում», — «Երեխաների պաշտպանություն» կազմակերպության ակտիվիստ Մարտին Վեգտերի խոսքը մեջբերում է կայքը։
Երեխաները` Լիլին (11 տարեկան) և Հովիկը (12), իրենց մոր հետ ինը տարի ապրել են Նիդեռլանդներում`սպասելով կացության իրավունքին։
Նրանց երեքին երեքշաբթի տեղափոխել են փախստականների կենտրոն, որը գտնվում է Ուտրեխտ նահանգի Ամերսֆորթ քաղաքում։ Երեխաները փախել են կենտրոնից, իսկ մայրը հրաժարվել է հայտնել նրանց տեղը։
Կայքում նշված է, որ կինը` Արմինա Համբարձումյանն այժմ Փարիզում է, որտեղից նա կմեկնի Երևան:
