ԵՐԵՎԱՆ, 18 օգոստոսի — Sputnik. Նոնա Մելիքյանը մինչև հիմա ուշքի չի գալիս: Բարսելոնայի կենտրոնական Լա Ռամբլա փողոցում տեղի ունեցած ահաբեկչական հարձակման ժամանակ հենց այդ փողոցում էր: Աչքով է տեսել, թե ինչպես է սպիտակ մինիվենը մխրճվել մարդկանց բազմության մեջ ու տրորել նրանց, հետո՝ կանգնել անիվների տակ հայտնված մարդկանց քանակի պատճառով: Տեսածը միանգամից չի հասկացել, գլխի է ընկել՝ ինչ է կատարվում, երբ մարդիկ սկսել են վազել իր ուղղությամբ, ինքն էլ նրանց հետ: Վազելով, ընկնել-վեր կենալով մի կերպ հասել է հարակից նեղ փողոցներից մեկի դեղատունը:
«Երբ դեղատնից դուրս եկա, տեսա, որ հիմա էլ հակառակ ուղղությամբ են մարդիկ դեպի ինձ վազում, այսինքն՝ոչ թե Ռամբլայից, այլ դեպի Ռամբլա: Պարզվեց` հենց այդ ուղղությամբ է գնացել ավտոմատով զինված ահաբեկիչներից մեկը, և հիմա էլ մարդիկ նրանից էին փախչում: Հարակից խանութներն այդ ժամանակ փակել էին իրենց երկաթե վարագույրները, ու հավաքված մարդիկ պաշտպանվելու տեղ չունեին, մնում էր միայն վազել»,- պատմում է Նոնան:
Այս պահին քաղաքում անվտանգության խիստ միջոցառումներ են իրականացվում: Ահաբեկչության ժամանակ քաղաքի կենտրոնում չեղած, բայց քաղաքի բնակիչ Արա Ոսկանյանը Sputnik Արմենիայի հետ զրույցում տեղեկացրեց, որ քաղաքի բոլոր հատվածներում տեսանելի են մեծաթիվ ոստիկանական մեքենաներ: Իշխանությունները մարդկանց հորդորում են տնից դուրս չգալ: Նախազգուշացնող հաղորդագրություններ են ստանում նաև բջջային կապով ու սոցիալական ցանցերով:
Մեր հայրենակիցը պնդում է՝ դեռ երկու ամիս առաջ գրեթե բոլոր լրատվամիջոցները պատմել են, որ ահաբեկչություն է կանխատեսվում, անվտանգության ուժերը միշտ զգոն են եղել, ու եթե չլիներ այդ ուշադրությունը, զոհերն ավելի շատ կլինեին:
ՀՀ արտաքին գործերի նախարարությունը հայտարարել է, որ նախնական տվյալներով` տուժածների թվում Հայաստանի քաղաքացիներ չկան: Ճշտումները շարունակվում են:
Բարսելոնայում 12 հազար հայ է ապրում: Նոնան ու Արան իրենց շրջապատում տուժածների մասին տեղեկություններ չունեն, բայց պետք չէ մոռանալ, որ այս ամառ Բարսելոնան հայաստանցի զբոսաշրջիկների նախընտրելի վայրերի թոփ եռյակում էր:
Նշենք, որ միկրոավտոբուսը մարդկանց բազմության մեջ էր մխրճվել երեկ երեկոյան։ Իսպանիայի իշխանությունները հայտարարել են, որ Բարսելոնայում կատարված ահաբեկչության հետևանքով զոհերի ու տուժածների թվում կա 18 երկրի քաղաքացի: Deutsche Welle-ի հաղորդմամբ՝ խոսքը վերաբերում է Ֆրանսիայի, Գերմանիայի, Նիդեռլանդների, Արգենտինայի, Վենեսուելայի, Բելգիայի, Ավստրալիայի, Հունգարիայի, Պերուի, Ռումինիայի, Իռլանդիայի, Հունաստանի, Կուբայի, Մակեդոնիայի, Չինաստանի, Իտալիայի և Ալժիրի քաղաքացիներին:
Ահաբեկչության գործով ձերբակալվել է 2 կասկածյալ, որոնք ծնունդով Հյուսիսային Աֆրիկայից են: Նշվում է, որ կատարվածի պատասխանատվությունը ստանձնել է «Իսլամական պետություն» ահաբեկչական խմբավորումը:
