ԵՐԵՎԱՆ, 30 օգոստոսի — Sputnik. Մայրաքաղաքի դպրոցների վերանորոգման հարցը Երևանի քաղաքապետարանի ուշադրության կենտրոնում է, այսօր լրագրողներին ասաց Երևանի քաղաքապետ Տարոն Մարգարյանը։
Նրա խոսքով` համապատասխան մարմիններն ամեն տարի նշված ժամկետներում զբաղվում են այդ հարցով կոնկրետ։
«Մենք պատրաստ ենք նոր ուսումնական տարվան։ Այժմ կառավարության որոշման համաձայն` յոթ դպրոց է վերանորոգվում մայրաքաղաքում։ Մեր խնդիրը տարբեր կառույցների հետ արդյունավետ համագործակցելն է, որի շնորհիվ հնարավոր կլինի վերանորոգել դպրոցները։ Անելիք դեռ շատ կա։ Երևանում կան ուսումնական հաստատություններ, որոնք անմխիթար վիճակում են», — ասաց Մարգարյանը։
Քաղաքապետի առաջնահերթ խնդիրն է այնպես անել, որ երեխաները հարմարավետ ու բարենպաստ պայմաններում սովորեն։
Նա նաև հավելեց, որ Երևանի վարչակազմն ամեն տարի օգնում է սոցիալապես անապահով ընտանիքների երեխաներին։
Երևանի հանրակրթական դպրոցների տնօրենների օգոստոսյան խորհրդակցությունների ամփոփումից առաջ կրթության և գիտության նախարար Լևոն Մկրտչյանը խոսեց դպրոցները բարեկարգելու մտադրության մասին։
«Օգոստոսյան խորհրդակցություններն ունեն երկու նպատակ՝ բացատրել մեր քաղաքականության հիմնական ուղղվածությունը, առաջիկա փոփոխությունները և լսել ուսուցիչների առաջարկները` ուսումնական գործընթացի կազմակերպման վերաբերյալ»,-ասաց նախարարը:
Մկրտչյանը պատմեց նաև նոր «Ուսուցիչ» ծրագրի մեկնարկի մասին, որի մանրամասները կներկայացվեն հոկտեմբերին` Ուսուցչի օրվան ընդառաջ։
«Ծրագիրը նպատակ ունի բարելավել ուսուցչի սոցիալական վիճակը, կարգավորել ուսուցչի ընտրության մեխանիզմներն ու այլ խնդիրները: Ծրագրի շնորհիվ կբարելավվի ուսուցչի հեղինակությունը հասարակությունում»,- ասաց Մկրտչյանը։
Նախարարը շեշտեց` Հայաստանում պետք է բարձրացնել կրթության մակարդակը։
