ԵՐԵՎԱՆ, 17 սեպտեմբերի — Sputnik. Երեկ՝ սեպտեմբերի 16-ին, Մոսկվայի «Սաֆիս» հարսանյաց սրահում կայացավ «Տաշիր» ընկերությունների խմբի ղեկավար Սամվել Կարապետյանի կրտսեր որդու հարսանյաց հանդիսությունը, որին ներկա էին մի շարք աստղեր:
Հրավիրված հյուրերի թվում էին նաև ՀՀ վարչապետ Կարեն Կարապետյանն ու ՀՀ նախագահ Սերժ Սարգսյանը: Հանդիսությունը վարում էին ամենահայտնի հաղորդավարները՝ Անդրեյ Մալախովը, Յանա Չուրիկովան ու Քսենյա Սոբչակը:
Kp.ru-ն հաշվել է, թե երիտասարդների ծնողները որքան գումար են ծախսել շքեղ հարսանիքի համար: Հարսի զգեստը (մոտ 7 կգ) կարել էր հայտնի դիզայներ Զուհաիր Մուրադը, որի կարած զգեստով էր ամուսնացել նաև գեղասահորդ Եվգենի Պլյուշչենկոյի հարսնացուն՝ պրոդյուսեր Յանա Ռուդկովսկայան:
Քանի որ Զուհաիր Մուրադը միայն բացառիկ զգեստներ է կարում, նրա ստեղծագործություններն արժեն նվազագույնը 50 հազար եվրո:
Աստղերի հոնորարները նույնպես քիչ չեն: Անդրեյ Մալախովը կորպորատիվներ վարելու համար այժմ 2 մլն ռուբլի է պահանջում, Քսենյա Սոբչակը` շուրջ 25 հազար եվրո, Էրոս Ռամազոտին ելույթի համար` մոտ 50 հազար եվրո, Նիկոլայ Բասկովը` 100 հազար եվրո, Ֆիլիպ Կիրկորովը` 150 հազար եվրո, «Լենինգրադ» խումբը` 150 հազար եվրո, Ալլա Պուգաչովան` շուրջ 350 հազար եվրո:
Սպիտակ տաղավար հիշեցնող 300 կիլոգրամանոց տորթը, որը հայտնի հրուշակագործ էր պատրաստել, նույնպես կլորիկ գումար արժեր` երիտասարդների ծնողները այս գլուխգործոցի համար մի քանի հարյուր հազար ռուբլի էին վճարել:
