ԵՐԵՎԱՆ, 19 սեպտեմբերի — Sputnik. Թուրքիայի հայերը «Ակոս» թերթի նախկին գլխավոր խմբագիր Հրանտ Դինքի մահից հետո վախենում են խոսել, Հայաստան-Սփյուռք համաժողովի շրջանակում «ՀՀ դիվանագիտության ջանքերը ցեղասպանությունների կանխարգելման ուղղությամբ» քննարկման ժամանակ ասաց Թուրքիայի խորհրդարանի հայ պատգամավոր Կարո Փայլանը։
«Թուրքահայերը վախի մեջ են ապրում և լռում են Հրանտի մահից հետո։ Նրանք ասում են, տեսեք` ինչ եղավ Հրանտի հետ», — ասաց Փայլանը։
Նրա խոսքով` դա սխալ մարտավարություն է, քանի որ լռությունը լավ բանի չի հանգեցնի։ Թուրք պատգամավորն ընդգծեց, որ մտադիր է Հայաստանի կառավարության հետ լուծել Հայաստանի և Թուրքիայի հարաբերություններում առկա ճգնաժամը։
Կարո Փայլանը Թուրքիայի խորհրդարանի երեք հայ պատգամավորներից մեկն է, որը թեկնածությունն առաջադրել էր քրդամետ Ժողովրդադեմոկրատական կուսակցության ցուցակով։
Քաղաքական գործչի խոսքով` ինքը պայքարում է հայ ժողովրդի 100-ամյա ողբերգության արդար գնահատականին հասնելու համար։
Նշենք, որ Հայաստան-Սփյուռք համահայկական վեցերորդ համաժողովը մեկնարկել է սեպտեմբերի 18-ին: Համաժողովն անցկացվում է 4 ուղղությամբ՝ Հայաստանի զարգացման հիմնախնդիրներ, Հայաստանի Հանրապետության պաշտպանական քաղաքականության առանձնահատկությունները ժամանակակից մարտահրավերների պայմաններում, Արտաքին քաղաքականության օրակարգ, Հայապահպանության հիմնախնդիրներ:
Մեծ պատվիրակություններ են ժամանել ՌԴ-ից (259), ԱՄՆ-ից (213), Ֆրանսիայից (92), Լիբանանից (107), Սիրիայից (44), Իրանից (56), Արգենտինայից (35), Կանադայից, Թուրքիայից, Վրաստանից: Առաջին անգամ համաժողովին մասնակցում են Մալայզիայի, Թաիլանդի, Սինգապուրի, Ճապոնիայի, Մեքսիկայի, Եթովպիայի, Սուդանի համայնքների ներկայացուցիչներ:
Մասնակիցների 35 տոկոսից ավելին կանայք են, մոտ 20 տոկոսը` երիտասարդները:
