ԵՐԵՎԱՆ, 10 հոկտեմբերի — Sputnik, Արմենուհի Մխոյան. Հոկտեմբերի 10-ին Գյումրու ծննդատանը 5 կգ 400 գրամ քաշով տղա է ծնվել: Երեխան ծնվել է բնական եղանակով: Փոքրիկի մայրը՝ 31-ամյա Ամալյա Շախոյանը, երրորդ անգամ է մայրանում։ Մյուս երեխաներն էլ են խոշոր քաշով ծնվել, բայց երրորդ փոքրիկը գերազանցել է նախորդներին։ «Գյումրու ծննդատուն» ՓԲԸ-ի տնօրեն Վարդան Սարգսյանի խոսքով, նման ծնունդները հազվադեպ են։
«Մենք նման քաշով երեխա մինչ այս չենք ունեցել եղել են մինչև 5 կգ քաշով փոքրիկներ, բայց ոչ դրանից շատ: Մայրը նախկինում էլ է խոշոր քաշով երեխաներ ունեցել՝ 4կգ 200 գրամ, 4կգ 700 գրամ, բայց այս փոքրիկը գերազանցեց տանը սպասող եղբորն ու քրոջը: Նման քաշով երեխաներ ընդհանուր առմամբ քիչ են հանդիպում», — Sputnik Արմենիայի հետ զրույցում ասաց Սարգսյանը` նշելով, որ ամենամեծ քաշը սովորաբար տատանվում է 3 կգ 500 գրամից 4 կգ-ի սահմանում։
Ամեն ինչ նորմալ ընթանալու դեպքում մայրիկին ու փոքրիկին դուրս կգրեն 2 օրից:
Փոքրիկ հսկան արդեն անուն էլ ունի։ Ծնողները որոշել են նրան Արամ կոչել։ Փոքրիկի ծնողները Շիրակի մարզի Ձիթահանքով գյուղից են: Հայրն այս պահին Հայաստանում չէ, ամիսներ առաջ նա արտագնա աշխատանքի է մեկնել Ռուսաստան:
