04:18 24 հոկտեմբերի 2017
Ուղիղ եթեր
Ավտոմեքենա

Աջ ղեկի ձախորդ ներկան. վտանգավորն ավտոմեքենան չէ, այլ վարորդը

© Sputnik/ Константин Чалабов
Հասարակություն
Ստանալ կարճ հղումը
48 0 0

Հայաստանում չեն դադարում աջակողմյան ղեկով ավտոմեքենաների արգելքի շուրջ քննարկումները։ Հայաստանյան երթևեկության համար վտանգավոր են ոչ թե աջակողմյան ղեկով ավտոմեքենաները, այլ վարորդները, կարծում է «Ավտովարորդների պաշտպանության լիգայի» նախագահ Տիգրան Հովհաննիսյանը։

ԵՐԵՎԱՆ, 12 հոկտեմբերի — Sputnik. Աջակողմյան ղեկով ավտոմեքենաները երթևեկության համար վտանգավոր են ոչ ավելի, քան ձախակողմյանները, Sputnik Արմենիայի հետ զրույցում ասաց «Ավտովարորդների պաշտպանության լիգայի» նախագահ Տիգրան Հովհաննիսյանը` մեկնաբանելով աջակողմյան ղեկով ավտոմեքենաների շահագործումը կանոնակարգելու կառավարության նախաձեռնությունը։

Վարորդների պաշտպանը «հակառակ» երթևեկության համար նախատեսված ավտոմեքենաներից առավել վտանգավոր է համարում ինչ-որ կերպ ղեկի մոտ հայտնված որոշ վարորդներին։

«Ոչ թե ավտոմեքենաները պետք է արգելեն, այլ որոշ վարորդների արգելեն նստել ղեկի մոտ, վարորդների մակարդակը պետք է բարձրացվի»,- ասում է Տիգրան Հովհաննիսյանը։

Նա ընդգծում է, որ այսօր վարորդական իրավունք ստանում են նույնիսկ վարել չիմացողները։

«Ո՛չ ավտոմեքենան է մեղավոր, ո՛չ աջ ղեկը, հիմնական մեղավորները վերևներում են։ Թող դրա փոխարեն ուսումնական բազաներ ստեղծեն։ ԴՕՍԱԱՖ-ները թալանեցին, կերան, հիմա համակարգչի դիմաց նստած քննություն են ընդունում»,-ասում է Հովհաննիսյանը։

Աջակողմյան ղեկով ավտոմեքենաների շահագործման ապագան Հայաստանում առայժմ մշուշոտ է։ Տրանսպորտի, կապի ու տեղեկատվական տեխնոլոգիաների նախարարությունից հայտնում են, որ այս պահին աջակողմյան ղեկով տրանսպորտային միջոցների շահագործումը դադարեցնելու, դրանց սեփականատերերի համար պայմաններ սահմանող կամ նրանց իրավունքները սահմանափակող որևէ իրավական ակտ չկա:

Ըստ նախարարության հայտարարության` Հայաստանի Հանրապետության ճանապարհային երթևեկության կարգավորման բարեփոխումների համատեքստում քննարկվում են խնդրի կարգավորման բոլոր տարբերակները՝ դժվարություններ չստեղծելով այդ տրանսպորտային միջոցների գործող սեփականատերերի համար: Ընդ որում` այդ քննարկումները ներառում են ճանապարհային երթևեկության անվտանգության տեսանկյունից շահագրգիռ բոլոր կողմերի ներկայացրած առաջարկները, որոնք ավարտուն տեսքի բերվելուց և ամփոփումներից հետո սահմանված կարգով կներկայացվեն թե՛ հասարակությանը և թե՛ շահագրգիռ մարմինների ներկայացուցիչներին:

Գլխավոր թեմաներ