ԵՐԵՎԱՆ, 21 հոկտեմբերի — Sputnik. Հայտնի դերասան Արմեն Ջիգարխանյանը չի կարողանում ներել կնոջը` Վիտալինա Ցիմբալյուկ-Ռոմանովսկայային, որն անչափ վիրավորել է ամուսնուն, երբ հայտնել է, որ ուզում է երեխա ունենալ։ Ջիգարխանյանն այս մասին պատմել է НТВ հեռուստաընկերության եթերում։
Ջիգարխանյանը 37-ամյա կնոջ այդ ցանկությունն ավելի քան տարօրինակ է համարում։
«Վիտալինան ուզում էր հասնել նրան, որ մենք երեխա ունենանք։ Միայն արկածախնդիր մարդը կարող է երեխա ունենալու առաջարկ անել ութսունամյա մարդուն»,- վստահեցրել է Ջիգարխանյանը։
Ջիգարխանյանը հոկտեմբերի 10-ից գտնվում է Մոսկվայի 57-րդ քաղաքային հիվանդանոցում։ Նրա առողջական վիճակը միջին ծանրության է։ Հայտնի է, որ 82-ամյա դերասանը պատրաստվում է բաժանվել 38-ամյա կնոջից։ Այդ փաստը հաստատել է նաև Ջիգարխանյանի ընկերը` Արթուր Սողոմոնյանը` շեշտելով, որ Ջիգարխանյանի ամբողջ ունեցվածքը կնոջ անունով է գրանցված։
Ավելի վաղ Ջիգարխանյանը հաղորդավար Անդրեյ Մալախովի հետ զրույցում ասել էր. «Ես պատրաստ չեմ ներել նրան ու այսօր «ո՛չ» եմ ասում նրան: Վճռական «ոչ» եմ ասում։ Ավելի կոպիտ ասեմ՝ նա իրեն ստորաբար պահեց, նա գող է, ոչ թե մարդ»։
Ջիգարխանյանի կինն առաջին հարցազրույցն է տվել սկանդալից հետո. «Այս ամենը սադրանք է»
ԽՍՀՄ ժողովրդական արտիստ Արմեն Ջիգարխանյանը ծնվել է 1935 թվականի հոկտեմբերի 3-ին Երևանում: Թատրոնում և կինոյում մարմնավորած կերպարների թիվը հասնում է 250-ի: Նրա խաղացած ամենահայտնի ֆիլմերից են «Բարև, ես եմ», «Ճայը», «Անորսալիների նոր արկածները», «Պարտիզպանի շունը», «Մրցանակ», «Երբ գալիս է սեպտեմբերը», «Բարև ձեզ, ես ձեր մորաքույրն եմ», «Հանդիպման վայրը փոխել չի կարելի», «Թեհրան-43», «Նիկոլո Պագանինի», «Անձնագիրը», «Արքայասպանը»։
