ԵՐԵՎԱՆ, 29 հոկտեմբերի — Sputnik. Հայտնի հեռուստահաղորդավար Անդրեյ Մալախովը ենթադրում է, որ հայտնի դերասան և ռեժիսոր Արմեն Ջիգարխանյանն իսկապես կարող էր նոր «ընկերների» ազդեցության տակ հայտնվել: Այդ մասին նա գրել է StarHit ամսագրի խմբագրական սյունակում:
Ամուսնական կողմերն ընտանեկան կոնֆլիկտի տարբեր պատճառներ են նշում: Մինչ այդ ինչպես Ջիգարխանյանն, այնպես էլ կինը ԶԼՄ-ներին հայտնել էին, որ կարևոր փաստաթղթեր են անհետացել: Ցիմբալյուկ-Ռոմանովսկայան ասել էր, որ կորել է կտակի բնօրինակը, ըստ որի` նրան էր փոխանցվել Ջիգարխանյանի անշարժ և շարժական գույքը, իսկ Ջիգարխանյանն ասել էր, որ կորել է իր անձնագիրը:
Մալախովի խոսքով` երրորդ անձինք կարող էին դերասանին նյարդալեզվաբանական ծրագրավորման ենթարկել: Պարզվում է` «դերասանի շրջապատում հայ նոր ընկերներ են հայտնվել, որոնք թույլ չեն տալիս, որ դերասանը շփվի Վիտալինայի հետ»:
«Իրավիճակին քաջածանոթ հոգեբանը կարծում է, որ Ջիգարխանյանի ընկերները նրան նյարդալեզվաբանական ծրագրավորման են ենթարկել: Այդ պատճառով էլ Ջիգարխանյանի թատրոնում հայտնաբերել են հաշվեհամարներ, որոնցով իբր թե փողեր են լվացվել», — գրել է նա:
Մալախովը նշում է, որ ստեղծված իրավիճակը ոչ միայն Վիտալինային է մտահոգում, այլև նրա բարեկամներին:
«Ստեղծված իրավիճակն ամենից շատ անհանգստացնում է դերասանի զոքանչին: Նա երկար տարիներ փեսային օգնել է աշխատանքում, եփել նրա սիրած լոռամրգի կոմպոտը, իսկ նա այդպես սևերես արեց նրա դստերը, որի հետ 16 տարի ապրել է», — գրում է Մալախովը:
Արմեն Ջիգարխանյանն ու Վիտալինա Ցիմբալյուկ-Ռոմանովսկայան միասին ապրել են ավելի քան 15 տարի, որից 1,5 տարին` պաշտոնապես գրանցված ամուսնությամբ:
Հիշեցնենք, որ Արմեն Ջիգարխանյանը հոկտեմբերի 10-ին հայտնվել էր Մոսկվայի 57-րդ քաղաքային հիվանդանոցում, որտեղ մնաց ավելի քան տասը օր: Հիվանդանոցում նա ասել էր, թե չգիտի ուր է գնալու, քանի որ ամբողջ ունեցվածքը կնոջ անունով է գրանցված։
