ԵՐԵՎԱՆ, 2 նոյեմբերի — Sputnik. Երեխաների` մանկատներում ու ինտերնատներում հայտնվելու գլխավոր պատճառը ծնողների սոցիալական վիճակն է, այսօր լրագրողների հետ զրույցում ասաց Հայաստանի մարդու իրավունքների պաշտպան Արման Թաթոյանը։
«Երեխաները հատուկ հաստատություններում են հայտնվում իրենց ընտանիքների սոցիալական խնդիրների պատճառով։ Հաշմանդամություն ունեցող երեխաներին նույնպես հատուկ հաստատություններ են տեղափոխում այն պատճառով, որ ծնողներն ի վիճակի չեն նրանց պատշաճ խնամքով ապահովել»,- ասաց Թաթոյանը։
Նրա խոսքով, պետությունը պարտավոր է միջոցներ ձեռնարկել ընտանիքի ինստիտուտը զարգացնելու, սոցիալապես անապահով ընտանիքներին աջակցելու համար։ Ակնհայտ է, որ երեխան երջանիկ է այն դեպքում, եթե մեծանում է ընտանիքում։ Բարձրակարգ որևէ հաստատություն չի կարող ծնողական ջերմություն փոխանցել երեխային։
«Մենք աշխատանք ենք տանում հասկանալու համար, թե ինչ պայմաններ են տիրում հատուկ հաստատություններում։ Աշխատում ենք այն ընտանիքների հետ, որտեղ հաշմանդամ երեխաներ կան, որպեսզի նրանց ընտանիք վերադարձնենք»,- ասաց Թաթոյանը։
Նա ընդգծեց, որ միջազգային փորձի հիման վրա աշխատանքներ են տարվում հատուկ հաստատություններում և ընտանիքներում երեխաների վիճակը բարելավելու ուղղությամբ։
