21:26 21 նոյեմբերի 2017
Ուղիղ եթեր
Ակցիա աբորտների դեմ

Ինչպես վերացնել «ավելորդ» աղջկան. հայկական ընտանիքների սարսափելի բաղադրատոմսերը

© AFP 2015/ Saul Loeb
Հասարակություն
Ստանալ կարճ հղումը
10200

Հայկական ընտանիքներում աղջիկն ուրախություն է, տղան՝ երջանկություն: Այդ երջանկության գինը հարյուրավոր և հազարավոր չծնված աղջիկներն են, գրում է գերմանական Der Tagesspiegel պորտալը:

ԵՐԵՎԱՆ, 15 նոյեմբերի – Sputnik, Արամ Գարեգինյան. Հայաստանը Չինաստանից հետո երկրորդ տեղում է նորածին տղաների և աղջիկների հարաբերակցությամբ: Նման տվյալներ է ներկայացրել գերմանական Der Tagesspiegel հրատարակությունն իր հոդվածում՝ մեջբերելով Համաշխարհային տնտեսական համաժողովի վերջին տվյալները:

«Հիմա ես մտածում եմ, թե ինչու չէի պայքարում»…

Կանայք հիվանդասենյակում անհանգիստ քչփչում են: Դեմքերին վախ է և անհամբերություն: Այսօր նրանք բժշկից կիմանան՝ աղջիկ են ունենալու թե տղա: Ինչ-որ մեկը խաչակնքում է:

«Ամուսինս սպասում է դարպասների մոտ: Եթե բժիշկն ասի՝ աղջիկ է, ապա, ավելի լավ է՝ հետ չգնամ»,- ասում է 35-ամյա Արևիկը Եղեգնաձորից:

Նա արդեն երկու աղջիկ ունի:

Մենք զրուցել էինք նրա հետ երկու տարի առաջ: Երբ Արևիկը հիշում է, թե ինչ է տեղի ունեցել դրանից հետո, սկսում է անհանգիստ քաշքշել բլուզի թելերը:

Այդ ժամանակ բժիշկն ասել էր նրան, որ աղջիկ է ունենալու: Հիվանդասենյակում հարևանուհիները խղճահարությամբ էին նայել նրան:

Իր չծնված աղջկա մասին նա այնքան զգուշությամբ է խոսում, ասես խոսքերը կարող են վնասել: Հղիության արհեստական ընդհատումից հետո Արևիկի մոտ առողջական խնդիրներ են ծագել: Նա արդեն չի կարող հղիանալ: Ամուսինը մեկնել է Ռուսաստան՝ արտագնա աշխատանքի: Այնտեղ ամուսնացել է, նոր կինը երեխայի է սպասում: Նա չի կարող ամուսնուն և նրա ազգականներին ներել նրա համար, որ իրեն համոզել են ընդհատել հղիությունը:

«Հիմա մտածում եմ, թե ինչու չէի պայքարում իմ չծնված երեխայի համար: Այդ ժամանակ ես կախված էի իմ ամուսնուց… Ոչ աշխատանք ունեի, ոչ փող», — ասում է նա: Հիմա կինը որոշել է պատմել իր պատմությունը, որպեսզի մյուս կանայք չկրկնեն իր քայլը:

Բավական անունով աղջիկը

«Աղջիկ ունենալը լավ է, բայց տղա ունենալն ավելի կարևոր է»,- ասում է 40-ամյա տաքսիստ Գարեգինը Երևանից: Երբ ծնվել է նրա առաջին երեխան՝ աղջիկ, ընկերները շնորհավորել են:

«Ես քիչ էր մնում ծեծկռտուքի մեջ մտնեի նրանց հետ: Մի՞թե այդ առիթով շնորհավորում են: Նորմալ տղամարդը պետք է տղա ունենա»,- բարկացած ասում է Գարեգինը:

«Ես այդ ժամանակ կնոջս ասացի՝ մեռնես էլ, պետք է տղա ունենաս: Երևի վախից ծնեց»,- ժպտում է նա:

ՄԱԿ-ի տվյալներով՝ նորածին աղջիկների և տղաների բնական հարաբերակցությունը 100 երեխայի դեպքում կազմում է 102/106: Տղաների էմբրիոններն ավելի  խոցելի են, ուստի բնությունն այնպես է անում, որ ավելի շատ տղաներ ծնվեն:

2000-2005 թ.թ.-ին Հայաստանում տղաների և աղջիկների հարաբերակցությունը կազմել է 120/100: Հիմա՝ 112: Եթե այդպես շարունակվի, ապա ՄԱԿ-ի գնահատականով՝ մինչև 2060 թ.-ը Հայաստանում տղամարդիկ 92 հազարով ավելի շատ կլինեն:

«Բավական է մտնել ցանկացած դասարան և տեսնել, թե այնտեղ որքան քիչ են աղջիկնորը»,- ասում է Անուշ Պետրոսյանը «Կանանց ռեսուրս-կենտրոն» ՀԿ-ից:

Տաքսիստ Գարեգինի կնոջ ծնողները 5 աղջիկ ունեն: Նրա կրտսեր քրոջն անվանել են Բավական: «Բավական է աղջիկ ունենալ, հիմա տղա է պետք»,- ահա թե ինչ էր դա նշանակում:

Ուստի, եթե ընտանիքում ծնվում էր երրորդ կամ չորրորդ աղջիկը, նրանց հենց այդպես էին անվանում:

Այստեղ էլ են ասպիրինով «բուժվում»

Ինչպես Գերմանիայում, այնպես էլ Հայաստանում արգելված է հղիության արհեստական ընդհատումը հղիության 12-րդ շաբաթից հետո, ուստի շատ կանայք փորձում են ընդհատել հղիությունն իրենց միջոցներով:

Այդ մեթոդները նրանք ներկայացնում են Facebook-ում: Իրենց ձեռքերով պատրաստած խմիչքներ՝  ասպիրինով և պղպեղով, անգամ ստամոքսի խոցի դեմ միջոցներ: Այդ դեղամիջոցը Հայաստանում վաճառվում է միայն բաղադրատոմսով, բայց այն վաճառում են անգամ «տակից»: Մեկ տուփն արժե մոտ 4 եվրո, իսկ օրինական աբորտն արժե մի քանի հարյուր եվրո:

Պահանջարկը ծնում է առաջարկից: Հայտնվում են նաև անօրինական մանկաբարձներ:

«Հղի կանայք նման մանկաբարձների հեռախոսները շատ լավ գիտեն»,- ասում է Անուշ Պողոսյանը:

Երևանի կենտրոնում բազմաթիվ անգամ բողոքի ակցիաներ են անցկացրել նման աբորտների դեմ:  Աղջիկ երեխաների ծնողները գետնին են շարել չծնված աղջիկների կոշիկներ:

«Ես չեմ ապրում, որովհետև ես աղջիկ եմ: Ես չեմ ապրում, որովհետև չեմ կարող շարունակել հորս ազգանունը: Ես չեմ ապրում, որովհետև ուզում էին, որ առաջնեկը տղա լինի: Ես չեմ ապրում, որովհետև իմ ծնողներն ուզում էին տղա ունենալ»,- ասում են կոշիկների կողքին դրված գրությունները:

Նրանք, ովքեր պետք է վազվզեին այդ կոշիկներով, հիմա չեն կարող խոսել:

Գլխավոր թեմաներ