ԵՐԵՎԱՆ, 27 նոյեմբերի — Sputnik. Հայտնի դերասան և շոումեն Միխայիլ Գալուստյանը դարձել է Չելյաբինսկի խորովածանոցի «դեմքը»։ Սակայն նրա բողոքից հետո Ռուսաստանի հակամենաշնորհային դաշնային ծառայությունը ստուգումներ է սկսել հաստատությունում, որն անօրինական կերպով օգտագործել է արտիստի լուսանկարը։ Այս մասին հայտնում է ՌԻԱ Նովոստին` հղում անելով ծառայությանը։
«Կոպեյսկի արագ սննդի հաստատության շենքի վրա փակցված գովազդային վահանակի վրա, բացի Միխայիլ Գալուստյանի լուսանկարից, գրված է նաև, «Խորոված, շաուրմա ածուխի վրա…»,- հայտնում է ՀԴԾ-ն։
Ծառայության աշխատակիցները հաստատության սեփականատիրոջ վերաբերյալ պաշտոնական հարցում են ուղարկել Կոպեյսկի քաղաքային վարչակազմ` գովազդային վահանակը տեղադրելու թույլտվության փաստաթղթերը ստուգելու համար։
Գովազդային օրենսդրությունը խախտելու համար գործ հարուցելու որոշումը կկայացվի 2017 թվականի դեկտեմբերի 10-ին։
Ռուսաստանի քաղաքացիական օրենսգրքի 152.1 հոդվածի 1-ի կետի համաձայն` քաղաքացու նկարի օգտագործումը թույլատրվում է միայն տվյալ մարդու համաձայնությունից հետո։
